Türkiýede kenarýaka futboly boýunça «World Winners Cup 2026» dünýä kubogy geçiriler
Amul Info ·
26-njy oktýabr — 1-nji noýabr aralygynda Türkiýäniň Alaniýa şäherinde «World Winners Cup 2026» kenarýaka futboly boýunça dünýä kubogy geçirilýär. Ýaryşa bäş yklymdan 44 klub, şol sanda erkekleriň we zenanlaryň toparlary gatnaşýar.
Türkiýäniň Antalýa welaýatynyň Alaniýa etrabynda 26-njy oktýabrdan 1-nji noýabra çenli kenarýaka futboly boýunça «World Winners Cup 2026» dünýä kubogy geçiriler. Halkara Beach Soccer Worldwide (BSWW) guramasy tarapyndan guralýan bu ýaryş dünýäniň dürli ýurtlaryndan klublary bir ýere jemlär.
Alaniýa bu halkara ýaryşa ýene-de bir gezek ýer eýeçiligini eder. Ýaryşyň duşuşyklary Halkara kenarýaka sport merkezinde geçiriler. Bu sport toplumy döwrebap infrastrukturasy we halkara ýaryşlary geçirmäge niýetlenen mümkinçilikleri bilen tapawutlanýar.
2026-njy ýylda geçiriljek dünýä kubogyna bäş yklymdan 44 klub gatnaşar. Erkekleriň we zenanlaryň toparlary bir hepdäniň dowamynda çempionlyk ugrunda güýç synanyşarlar.
Ýaryş geçiriljek sport merkeziniň esasy meýdançasy 3 müň 300 tomaşaçy üçin niýetlenendir. Toplumda agşamky duşuşyklary geçirmek üçin döwrebap yşyklandyryş ulgamlary bilen enjamlaşdyrylan dört sany oýun meýdançasy hem bar.
Guramaçylaryň maglumatlaryna görä, ýaryş türgenleri, resmi wekilleri we köpçülikleýin habar beriş serişdeleriniň wekillerini goşmak bilen, takmynan 800 adamy bir ýere jemlär. Duşuşyklaryň göni ýaýlymlarynyň dünýäniň 100 ýurduna ýetirilmegi meýilleşdirilýär.
Sport çäresiniň geçiriljek döwri Türkiýäniň Respublika güni bilen hem gabat gelýär. 29-njy oktýabrda bellenilýän bu milli baýram ýaryşa aýratyn öwüşgin berer.
Alaniýa halkara sport merkezleriniň biri hökmünde tanalýar
Ortaýer deňziniň kenarynda ýerleşýän Alaniýa amatly howa şertleri, arassa kenarlary, myhmanhanalary we ösen sport infrastrukturasy bilen syýahatçylaryň hem-de türgenleriň ünsüni özüne çekýär. Ýylyň dowamynda günüň köp böleginiň güneşli bolmagy bu ýerde açyk howada sport ýaryşlaryny guramaga mümkinçilik döredýär.
Sebitde her ýyl köp sanly halkara sport çäresi geçirilýär. Döwrebap sport desgalary Alaniýanyň kenarýaka sport görnüşlerini ösdürmekde we halkara ýaryşlaryny kabul etmekde ähmiýetini artdyrýar.
«World Winners Cup 2026» dünýä kubogynyň geçirilmegi hem Alaniýanyň halkara sport ulgamyndaky ornuny berkitmäge, dürli ýurtlardan türgenleri we sport janköýerlerini özüne çekmäge ýardam eder.