Türkmenistan bilen DCO sanly özgertmeler we maýa goýumlary çekmek boýunça hyzmatdaşlygy ösdürýär
Amul Info ·
2026-njy ýylyň 10-njy noýabrynda Türkmenistanyň Aragatnaşyk ministrliginiň wekilleri bilen Sanly hyzmatdaşlyk guramasynyň (DCO) arasynda onlaýn duşuşyk geçirildi. Onda sanly özgertmeler, maýa goýumlaryny çekmek, startap taslamalaryny goldamak we «Merkezi Aziýa — Ýewropa» sanly geçelgesini ösdürmek…
2026-njy ýylyň 10-njy noýabrynda Türkmenistanyň Aragatnaşyk ministrliginiň wekilleri bilen Sanly hyzmatdaşlyk guramasynyň (DCO) wekilleriniň arasynda onlaýn duşuşyk geçirildi. Duşuşygyň dowamynda taraplar özara hyzmatdaşlygy ösdürmegiň geljekki ugurlaryny, şol sanda bilelikdäki iş toparyny döretmek, maýa goýumlaryny çekmek, başlangyç taslamalary goldamak we «Merkezi Aziýa — Ýewropa» sanly geçelgesini ösdürmek meselelerini ara alyp maslahatlaşdylar.
2020-nji ýylyň noýabr aýynda döredilen Sanly hyzmatdaşlyk guramasy (DCO) Saud Arabystany Patyşalygynyň Er-Riýad şäherinde ýerleşýän halkara köptaraplaýyn guramadyr. Guramanyň ýokary dolandyryş edarasy Ministrler Geňeşi bolup, onuň düzümine agza döwletleriň aragatnaşyk we maglumat tehnologiýalary boýunça jogapkär ministrlikleriniň wekilleri girýär.
DCO-nyň Baş sekretary Dima Al-Ýahýanyň ýolbaşçylygynda alnyp barylýan işleriň esasy maksady sanly mümkinçiliklerden hemmeleriň peýdalanyp bilmegini üpjün etmek, sanly deňsizligi azaltmak we inklýuziw sanly ykdysadyýetiň ösüşini çaltlandyrmakdan ybaratdyr. Gurama ýaşlaryň, zenanlaryň we telekeçileriň sanly mümkinçiliklerini giňeltmäge, serhetüsti maglumat alyş-çalşygyny ösdürmäge hem-de kiberhowpsuzlygy pugtalandyrmaga aýratyn ähmiýet berýär.
DCO bilen hyzmatdaşlyk Türkmenistanyň sanly özgertmeler ulgamynda öňdebaryjy halkara tejribäni öwrenmegine we ornaşdyrmagyna, şeýle hem halkara ülňülerinden peýdalanmagyna giň mümkinçilikleri açýar. Hususan-da, guramanyň agza döwletleri bilen tejribe alyşmak elektron hökümet ulgamyny kämilleşdirmäge, emeli aň tehnologiýalaryny we akylly çözgütleri ornaşdyrmaga, şeýle-de startap ekoulgamynyň ösüşine ýardam edip biler.
Duşuşygyň netijesinde türkmen tarapy DCO-ny «Türkmentel — 2026» atly halkara sergä gatnaşmaga çagyrdy. Öz gezeginde guramanyň wekilleri 2027-nji ýylyň martynda Yslamabat şäherinde geçiriljek DCO-nyň Ministrler Geňeşiniň mejlisine gatnaşmak üçin türkmen tarapyna resmi çakylyk ibermegi meýilleşdirýändiklerini mälim etdiler.