Türkmen oba hojalyk institutynda halkara ylmy taslamalar bäsleşiginiň netijeleri jemlendi
Amul Info ·
Türkmenistanyň Oba hojalyk institutynda «Agroinnowasiýalar: durnukly ösüşe tarap» atly III halkara ylmy taslamalar bäsleşiginiň netijeleri jemlendi. 11 ýurtdan 94 sany ýokary okuw mekdebiniň talyplary 280-e golaý taslama hödürlediler. Işler oba hojalygy, IT we biznes ugurlary boýunça…
Türkmenistanyň Oba hojalyk instituty tarapyndan 11–12-nji noýabrda ýokary okuw mekdepleriniň talyplarynyň arasynda geçirilen «Agroinnowasiýalar: durnukly ösüşe tarap» atly III halkara ylmy taslamalar bäsleşiginiň netijeleri jemlendi.
Iki gün dowam eden onlaýn bäsleşige Türkmenistanyň, Russiýanyň, Belarusyň, Gazagystanyň, Gyrgyzystanyň, Hytaýyň, Özbegistanyň, Pakistanyň, Rumyniýanyň, Moldowanyň we Täjigistanyň ýokary okuw mekdeplerinde bilim alýan talyplar gatnaşdy. Olar eminler toparyna ylmy-barlag taslamalaryny we inženerçilik işläp taýýarlamalaryny hödürlediler.
Bäsleşige Türkmenistanyň we daşary ýurtlaryň 94 sany ýokary okuw mekdebinden jemi 280-e golaý taslama gelip gowuşdy. Hödürlenen işler «Oba hojalyk taslamalary», «IT taslamalary» we «Biznes taslamalary» diýen üç ugur boýunça seljerildi. Taslamalara baha berlende olaryň wajyplygy, täzeligi, mazmuny, gerimi, durmuşa geçirmek mümkinçiligi we daşky gurşawa ýetirýän täsiri ýaly alty ölçeg nazara alyndy.
«Oba hojalyk taslamalary» ugry boýunça jemi 49 baýrakly orun kesgitlenildi. Olaryň 9-sy birinji, 13-si ikinji, 27-si üçünji orun boldy. Birinji orunlara Magtymguly adyndaky Türkmen döwlet uniwersitetiniň, S.A.Nyýazow adyndaky Türkmen oba hojalyk uniwersitetiniň, şeýle hem Russiýanyň, Özbegistanyň, Rumyniýanyň we Hytaýyň ýokary okuw mekdepleriniň talyplary mynasyp boldular.
Baýrakly işleriň hatarynda gök iriň taýajygy sebäpli döreýän ýokanç kesellere garşy bakteriofaglary ulanmak, gök tudananyň täze şertlere uýgunlaşdyrylmagy, sygyrlarda mastit keselini bejermegiň usullaryny işläp düzmek we oba hojalygyny durnukly ösdürmek boýunça ylmy barlaglar bar. Türkmenistanyň wekilleriniň fosforly dökünleri ulanmak we ýüpek önümçiligini gaýtadan işlemegiň tehnologiýalaryny kämilleşdirmek baradaky taslamalary hem aýratyn bellenildi.
«IT taslamalary» ugry boýunça 53 baýrakly orun berildi. Şol sanda 9 taslama birinji, 16-sy ikinji, 28-si üçünji orna mynasyp boldy. Birinji orunlary Türkmen oba hojalyk institutynyň, Türkmenistanyň Içeri işler ministrliginiň institutynyň, Halkara ynsanperwer ylymlary we ösüş uniwersitetiniň, şeýle hem Moldowanyň, Russiýanyň, Belarusyň we Gazagystanyň ýokary okuw mekdepleriniň wekilleri eýelediler.
Bu ugurda suwuň ýitgilerini hemra arkaly gözegçilikde saklamak ulgamlary, maşyn öwreniş tehnologiýasyna esaslanýan akylly awtomatik suwaryş ulgamlary, takyk ekerançylyk üçin niýetlenen az çykdajyly skanerler, şeýle hem «Bereketli Ädim» we «СтудБел» atly sanly platformalar gyzyklanma döreden işleriň hatarynda boldy.
«Biznes taslamalary» ugry boýunça 39 baýrakly orun kesgitlenildi. Olaryň 8-si birinji, 13-si ikinji, 18-si üçünji orun boldy. Birinji orna mynasyp bolanlaryň hataryna Türkmen döwlet ykdysadyýet we dolandyryş institutynyň, Türkmen oba hojalyk institutynyň, Oguz han adyndaky Türkmenistanyň Inžener-tehnologiýalar uniwersitetiniň, şeýle hem Russiýanyň, Belarusyň we Gazagystanyň ýokary okuw mekdepleriniň talyplary girdiler.
Bu ugurda amaly we täjirçilik taýdan ähmiýetli taslamalara ýokary baha berildi. Olaryň arasynda kämilleşdirilen akwaponika ulgamy, önümçilik galyndylaryndan taýýarlanan kompozit materiallar, pomidorlary biologik usulda goramak serişdeleri, darçyn esasynda öndürilen antibakterial spreý, kartoşkany ýygnamak işlerini mehanizasiýalaşdyrmak boýunça çözgütler, suwy arassalamak tehnologiýalary we serişdeleri alyş-çalyş etmek üçin sanly platforma bar.
Guramaçylaryň bellemegine görä, bäsleşige Türkmenistanyň ýokary okuw mekdepleriniň talyplary we ýaş ylmy işgärleri tarapyndan köp sanly taslamanyň hödürlenmegi ýaşlaryň ylmy-barlag işlerine, innowasion çözgütleri işläp taýýarlamaga we döwrebap tehnologiýalary ykdysadyýetiň dürli pudaklarynda ulanmaga bolan gyzyklanmasynyň artýandygyny görkezýär.
III halkara ylmy taslamalar bäsleşigi ýaşlaryň tebigy serişdeleri rejeli peýdalanmak, sanlylaşdyrmak, oba hojalyk önümçiliginiň netijeliligini ýokarlandyrmak we durnukly ösüşi üpjün etmek bilen bagly meseleleriň çözgütlerini işläp taýýarlamaga işjeň gatnaşýandygyny aýdyň görkezdi.
Türkmen oba hojalyk instituty geljekde hem bu ugurdaky işleri dowam etdirip, ýaş gözlegçileriň ylmy pikirlerini we geljegi uly taslamalaryny durmuşa geçirmekleri üçin täze mümkinçilikleri döretmegi maksat edinýär.