Türkmenistanyň migrasiýa syýasatynyň ileri tutulýan ugurlary Ženewada beýan edildi
Amul Info ·
2026-njy ýylyň 12-nji oktýabrynda Ženewada BMG-niň Bosgunlar boýunça Ýokary komissarynyň Ýerine ýetiriji komitetiniň 77-nji mejlisi öz işine başlady. Oňa Türkmenistanyň Döwlet migrasiýa gullugynyň başlygy A. Sazakowyň ýolbaşçylygyndaky türkmen wekiliýeti gatnaşýar.
2026-njy ýylyň 12-nji oktýabrynda Şweýsariýanyň Ženewa şäherindäki Milletler köşgünde BMG-niň Bosgunlar boýunça Ýokary komissarynyň Ýerine ýetiriji komitetiniň 77-nji mejlisi öz işine başlady. Halkara çärä Türkmenistanyň Döwlet migrasiýa gullugynyň başlygy A. Sazakowyň ýolbaşçylygyndaky türkmen wekiliýeti gatnaşýar.
Şu ýyl geçirilýän mejlisiň ähmiýeti aýratyn bellenilýär. Halkara jemgyýetçiligi mejbury göçürilen adamlaryň hukuklaryny goramak ulgamynyň möhüm binýadyny emele getiren Bosgunlaryň statusy hakynda 1951-nji ýylyň Konwensiýasynyň kabul edilmegine 75 ýyl dolmagyny belleýär.
Mejlisiň umumy plenar mejlisinde çykyş eden Türkmenistanyň wekiliýetiniň ýolbaşçysy ynsanperwerligiň ýurdumyzyň döwlet syýasatynyň ileri tutulýan ugurlarynyň biridigini nygtady. Türkmenistanyň Konstitusiýasyna laýyklykda, adam jemgyýetiň we döwletiň iň ýokary gymmatlygy hökmünde ykrar edilýär. Bu ýörelge ýurtda ýaşaýan adamlaryň hukuklaryny we azatlyklaryny üpjün etmäge gönükdirilen işleriň esasy bolup durýar.
Çykyşda Türkmenistanyň Prezidenti Serdar Berdimuhamedowyň 2025-nji ýylda BMG-niň Baş Assambleýasynyň 80-nji sessiýasynda öňe süren 2028-nji ýyly «Halkara hukuk ýyly» diýip yglan etmek baradaky başlangyjyna aýratyn üns berildi.
Bu başlangyjyň häzirki döwürde halkara hukugynyň hökmürowanlygyny pugtalandyrmaga, şeýle hem döwletleriň halkara borçnamalarynyň ýerine ýetirilişiniň netijeliligini ýokarlandyrmaga gönükdirilýändigi bellenildi.
Mejlisiň dowamynda Türkmenistanda raýatsyzlygy aradan aýyrmak boýunça 2019–2024-nji ýyllar üçin Hereketleriň milli meýilnamasynyň üstünlikli durmuşa geçirilmeginiň ähmiýeti hem nygtaldy.
Maglumatlara görä, bu ugurda alnyp barlan işleriň netijesinde 32 müňden gowrak adam Türkmenistanyň raýatlygyna kabul edildi, 5 müňden gowrak adama bolsa Türkmenistanda ýaşamak üçin ygtyýarnama berildi.
Türkmenistanyň Garaşsyzlygynyň 35 ýyllygynyň öňüsyrasynda Prezident Serdar Berdimuhamedowyň Permanyna laýyklykda, ýene-de 146 sany daşary ýurt raýatyna Türkmenistanda ýaşamak üçin ygtyýarnamanyň berilmegi ynsanperwer syýasatyň dowam etdirilýändigini görkezýär.
Türkmen tarapy migrasiýa ulgamynda halkara hyzmatdaşlygyny mundan beýläk-de pugtalandyrmaga taýýardygyny tassyklady. Şunda hyzmatdaşlygyň şertnamalaýyn-hukuk binýadyny giňeltmek, sanly maglumatlary we tejribäni alyşmak, durnukly ösüş hem-de ynsanperwer hyzmatdaşlyk boýunça halkara maksatnamalaryny we başlangyçlaryny durmuşa geçirmäge gatnaşmak möhüm ugurlar hökmünde görkezildi.
Şeýle hem migrasiýa meselelerini netijeli dolandyrmagyň döwletleriň tagallalaryny utgaşdyrmagy we halkara dialogyny ösdürmegi talap edýändigi bellenildi.
BMG-niň Bosgunlar boýunça Ýokary komissarynyň Ýerine ýetiriji komitetiniň 77-nji mejlisi 2026-njy ýylyň 16-njy oktýabryna çenli dowam eder.