Garri Keyn Angliya terma jamoasida yangi rekord o‘rnatdi
Amul Info ·
Angliya terma jamoasi hujumchisi Garri Keyn milliy jamoa safida o‘tkazgan o‘yinlari soni bo‘yicha yangi rekord o‘rnatdi. Xorvatiyaga qarshi uchrashuv uning terma jamoadagi 126-o‘yini bo‘ldi. Shu tariqa u avvalgi rekordchi Piter Shiltondan o‘zib ketdi. Keyn Angliya terma jamoasi tarixidagi eng…
Angliya futbol terma jamoasi hujumchisi Garri Keyn milliy jamoa safida o‘tkazgan o‘yinlari soni bo‘yicha yangi rekord egasiga aylandi. U bu ko‘rsatkich bo‘yicha avvalgi rekordchi, mashhur darvozabon Piter Shiltonga tegishli natijadan o‘zib ketdi.
Millatlar ligasi guruh bosqichining beshinchi turida Xorvatiya terma jamoasiga qarshi o‘z maydonida o‘tkazilgan uchrashuv Garri Keyn uchun Angliya terma jamoasi safidagi 126-o‘yin bo‘ldi. Bungacha u terma jamoa safida o‘tkazilgan uchrashuvlar soni bo‘yicha Piter Shilton bilan teng edi.
33 yoshli hujumchi 2023-yil yozidan buyon Germaniyaning “Bavariya” klubida to‘p surmoqda. U ushbu klub tarkibida ikki marta Germaniya chempioni bo‘ldi, ikki bor mamlakat Superkubogini va bir marta Germaniya kubogini qo‘lga kiritdi.
Keyn 2024/2025 va 2025/2026-yilgi mavsumlarda Yevropa milliy chempionatlarining eng yaxshi to‘purari sifatida “Oltin butsa” mukofotiga sazovor bo‘ldi. Shuningdek, joriy yilning oktabr oyida France Football jurnali talqiniga ko‘ra, mavsumning eng yaxshi futbolchisiga topshiriladigan “Oltin to‘p” mukofotini ham qo‘lga kiritdi.
Angliya terma jamoasi safida 91 ta gol urgan Garri Keyn bu ko‘rsatkich bo‘yicha ham jamoa tarixidagi eng sermahsul futbolchi hisoblanadi. U 2021 va 2024-yillarda o‘tkazilgan Yevropa chempionatlarida kumush medallarga sazovor bo‘lgan. 2019-yilda Angliya terma jamoasining Millatlar ligasidagi ilk mavsumda uchinchi o‘rinni egallashiga, 2026-yilda esa jahon chempionatida bronza medalini qo‘lga kiritishiga hissa qo‘shgan.
Keyn jahon chempionatlari tarixidagi eng ko‘p gol urgan futbolchilarning kuchli beshligiga ham kiradi. Uning hisobida 14 ta gol bor. Hujumchi 2018-yilda Rossiyada o‘tkazilgan jahon chempionatida olti gol urib, turnirning eng yaxshi to‘purari bo‘lgan.
Angliya terma jamoasida avvalgi rekord egasi bo‘lgan Piter Shiltonga hozir 77 yosh. U 1966–1997-yillar oralig‘ida professional futbolchi sifatida faoliyat yuritgan va butun faoliyati davomida Angliya klublarida to‘p surgan.
Shilton “Nottingem Forest” jamoasi tarkibida 1978-yilda Angliya chempionligini qo‘lga kiritgan. Shuningdek, ushbu klub bilan 1979 va 1980-yillarda Yevropa chempion klublari kubogini, 1979-yilda UEFA Superkubogi va Angliya Liga kubogini, 1978-yilda esa mamlakat Superkubogini yutgan.
Bundan tashqari, darvozabon “Lester” jamoasida o‘ynagan davrida 1971-yilda Angliya ikkinchi divizioni chempioni bo‘lgan va mamlakat Superkubogini ham qo‘lga kiritgan.
Piter Shilton 1982, 1986 va 1990-yillarda o‘tkazilgan jahon chempionatlarida Angliya terma jamoasi darvozasini qo‘riqlagan. 1990-yilda Italiyada bo‘lib o‘tgan jahon chempionatida inglizlar to‘rtinchi o‘rinni egallagan.