Türkmenistanyň Ýaragly Güýçleriniň harby bölüminde täze desgalar toplumy açyldy
Amul Info ·
Toplumda dolandyryş binasy, ýatakhanalar, saglyk bölümi, naharhana, okuw we sport meýdançalary ýerleşýär. Şeýle hem harby gullukçylaryň maşgalalary üçin 96 öýli iki sany ýaşaýyş jaýy ulanmaga berildi. Döwlet Baştutany täze öý eýelerini gutlap, harby bölüme awtoulag tehnikalaryny sowgat berdi.
2026-njy ýylyň 21-nji oktýabrynda Türkmenistanyň Prezidenti, ýurduň Ýaragly Güýçleriniň Belent Serkerdebaşysy, goşun generaly Serdar Berdimuhamedow harby bölümiň täze binalar we desgalar toplumynyň açylyş dabarasyna gatnaşdy. Täze toplumyň ulanmaga taýýardygy barada Döwlet howpsuzlyk geňeşiniň sekretary, goranmak ministri Begenç Gündogdyýew döwlet Baştutanyna hasabat berdi.
Döwrebap harby şäherçäniň düzümine dolandyryş binasy, esgerler üçin ýatakhanalar, halkara ölçeglerine laýyk gelýän lukmançylyk enjamlary bilen üpjün edilen saglyk bölümi, naharhana, okuw päsgelçilik zolagy we sport meýdançalary girýär.
Döwlet Baştutany harby bölüme saparynyň dowamynda dolandyryş binasynda milli goşunyň ýaraglarynyň häzirki zaman nusgalary we harby gullukda ulanylýan uçarmansyz uçýan enjamlar bilen tanyşdy. Şeýle hem harby gullukçylaryň gulluk we dynç alyş şertlerine, olaryň gündelik durmuşynyň talabalaýyk guralyşyna üns berdi.
Harby gullukçylaryň we olaryň maşgala agzalarynyň ýaşaýyş-durmuş şertlerini gowulandyrmak hem täze toplumyň esasy ugurlarynyň biri boldy. Harby şäherçäniň çäginde jemi 96 maşgala niýetlenen iki gatly iki sany ýaşaýyş jaýy ulanmaga berildi. Mundan başga-da, çagalar üçin oýun meýdançalary, ýurdumyzyň öndürýän önümleriniň giň görnüşlerini hödürleýän dükan we milli däp-dessurlary geçirmek üçin ýörite bina guruldy.
Açylyş dabarasynyň çäklerinde Prezident Serdar Berdimuhamedow täze öýlere göçüp gelen maşgalalaryň biriniň ýaşaýyş jaýyna baryp görüp, täze jaý eýelerini gutlady. Şeýle hem harby bölüme awtoulag tehnikalaryny sowgat berdi.
Täze harby desgalar toplumynyň ulanmaga berilmegi harby gullukçylaryň gulluk şertlerini kämilleşdirmek, olaryň ýaşaýyş-durmuş derejesini ýokarlandyrmak we milli goşunyň maddy-enjamlaýyn binýadyny döwrebaplaşdyrmak boýunça alnyp barylýan işleriň nobatdaky tapgyry boldy.