Turkmanistonning olis aholi punktlarida 10 tagacha kichik quyosh elektr stansiyasi quriladi
Amul Info ·
Turkmanistonning olis aholi punktlarida umumiy quvvati 2 megavattgacha bo‘lgan 10 tagacha kichik quyosh elektr stansiyasini qurish rejalashtirilmoqda. Bu borada Turkmaniston hukumati va BMT Taraqqiyot dasturi o‘rtasida besh yillik hamkorlik kelishuvi imzolandi. Global ekologik jamg‘armaning 4,17…
Turkmaniston Hukumati va Birlashgan Millatlar Tashkilotining Taraqqiyot dasturi (BMTTD) qayta tiklanuvchi energiya manbalarini rivojlantirish bo‘yicha besh yillik hamkorlik bitimini imzoladi. Loyiha doirasida mamlakatning olis aholi punktlarida umumiy quvvati 2 megavattgacha bo‘lgan 10 tagacha tajriba tariqasidagi kichik quyosh elektr stansiyasini qurish rejalashtirilmoqda. Bu haqda BMTTDning Turkmanistondagi vakolatxonasi rasmiy saytida xabar berildi.
Bitim 2026-yil 11-noyabr kuni Turkiyaning Antaliya shahrida BMTning Iqlim o‘zgarishi to‘g‘risidagi doiraviy konvensiyasi ishtirokchilari konferensiyasining 31-sessiyasi doirasida imzolandi.
“Turkmanistonning olis aholi punktlarida energetik o‘tishni qo‘llab-quvvatlash” nomli loyiha Global ekologiya jamg‘armasi tomonidan 4,17 million AQSh dollaridan ortiq grant mablag‘i bilan moliyalashtiriladi. Loyihani BMT Loyihalarga xizmat ko‘rsatish boshqarmasi (UNOPS) Turkmaniston Atrof-muhitni muhofaza qilish vazirligi va Energetika vazirligi bilan hamkorlikda amalga oshiradi.
Tashabbusning asosiy maqsadi qayta tiklanuvchi energiya manbalaridan foydalanishni kengaytirish hamda olis hududlar aholisini ishonchli va ekologik toza elektr energiyasi bilan ta’minlashdan iborat. Kichik quyosh elektr stansiyalarining qurilishi olis aholi punktlarida quyosh energiyasidan foydalanish imkoniyatlarini amaliy jihatdan namoyish etish, shuningdek, kelgusida shunga o‘xshash loyihalarni kengaytirish uchun zamin yaratadi.
Bundan tashqari, loyiha doirasida yana 120 ta olis aholi punktida quyosh energetikasi tizimlarini joriy etish imkoniyatlarini aniqlash maqsadida texnik-iqtisodiy baholash ishlari o‘tkaziladi va tegishli texnik hujjatlar tayyorlanadi. Bu ishlar kelgusida qo‘shimcha investitsiyalarni jalb qilish hamda dasturni kengaytirish uchun zarur ma’lumotlarni to‘plash imkonini beradi.
BMTTDning Turkmanistondagi doimiy vakili Narine Saakyan ta’kidlaganidek, ishonchli va ekologik toza energiya manbalaridan foydalanish imkoniyatlarini kengaytirish aholi turmush darajasini oshirish, mahalliy hamjamiyatlarning barqarorligini mustahkamlash va mamlakatning barqaror rivojlanishini ta’minlashda muhim ahamiyatga ega.
Uning qayd etishicha, loyiha davlat siyosatini takomillashtirish, milliy salohiyatni mustahkamlash va quyosh energetikasiga yo‘naltirilgan amaliy investitsiyalarni o‘zaro uyg‘unlashtiradi. Shuningdek, yangi energetika yechimlarining afzalliklaridan barcha mahalliy aholi, jumladan, ayollar va qo‘llab-quvvatlashga muhtoj aholi qatlamlari ham foydalanishiga alohida e’tibor qaratiladi.
Quyosh elektr stansiyalarini qurish bilan bir qatorda, loyiha qayta tiklanuvchi energiya manbalari sohasidagi huquqiy va institutsional asoslarni takomillashtirish, mutaxassislarni tayyorlash hamda milliy kasbiy ko‘nikmalarni rivojlantirishni ham nazarda tutadi.
Loyiha 2030-yilgacha qayta tiklanuvchi energiya manbalarini rivojlantirish milliy strategiyasi va Iqlim o‘zgarishi bo‘yicha milliy strategiya maqsadlariga mos keladi. Uni amalga oshirish Turkmanistonning Parij bitimi doirasidagi majburiyatlarini bajarishiga hamda Birlashgan Millatlar Tashkilotining Barqaror rivojlanish maqsadlariga erishishiga hissa qo‘shadi.