Hytaýyň Hunan welaýaty Merkezi Aziýanyň bazarlaryna çykmagyň ýollaryny öwrenýär
Amul Info ·
Hytaýyň Çanşa şäherinde 17–19-njy oktýabrda Merkezi Aziýa bilen söwda-ykdysady hyzmatdaşlyga bagyşlanan sebit konferensiýasy geçirildi. Forumda 300-den gowrak wekiliň gatnaşmagynda senagat, energetika, logistika we maýa goýum hyzmatdaşlygyny ösdürmek meseleleri ara alnyp maslahatlaşyldy. Merkezi…
Hytaýyň Çanşa şäherinde 17–19-njy oktýabrda Merkezi Aziýa ýurtlary bilen söwda-ykdysady hyzmatdaşlyk boýunça sebit konferensiýasy geçirildi. 300-den gowrak wekili, şol sanda birnäçe döwletiň diplomatik wekillerini, iri kärhanalaryň ýolbaşçylaryny we bilermenleri bir ýere jemlän forum senagat hyzmatdaşlygyny ösdürmäge hem-de maýa goýum gatnaşyklaryny giňeltmäge bagyşlandy.
Çäräniň guramaçylary hyzmatdaşlygyň alty sany ileri tutulýan ugruny hödürlediler. Olaryň hatarynda gurluşyk tehnikalary, biomedisina, infrastruktura gurluşygy, energetika, mineral serişdeler, serhetüsti logistika we standartlary özara ykrar etmek ýaly ugurlar bar.
Maslahata gatnaşyjylaryň aýratyn ünsüni Merkezi Aziýa ýurtlarynda durmuşa geçirmek üçin taýýarlanan 66 sany esasy maýa goýum taslamasy çekdi. Bu taslamalar tebigy baýlyklary özleşdirmek, gaýtadan dikeldilýän energiýa çeşmelerini ösdürmek, ekologiýa inžiniringi we häzirki zaman tehnologik ulgamlaryny ornaşdyrmak ýaly ugurlary öz içine alýar.
Konferensiýanyň çäklerinde Şaýan şäheriniň telekeçileriniň wekiliýeti «Beixi International» kompaniýasynyň başlygy Li Ýiniň ýolbaşçylygynda daşary ýurtly hyzmatdaşlar bilen birnäçe maksatly gepleşikleri geçirdi. Hytaýly telekeçiler Merkezi Aziýa sebitiniň kadalaşdyryjy-hukuk şertlerini we ykdysadyýetiň dürli pudaklarynda hyzmatdaşlyk mümkinçiliklerini öwrenip, «Merkezi Aziýanyň serişdeleri we hytaý kärhanalarynyň önümçilik mümkinçilikleri» ýörelgesine esaslanýan amaly hyzmatdaşlygy ösdürmäge gyzyklanma bildirdiler.
Forumyň gatnaşyjylarynyň bellemegine görä, ulag-logistika geçelgeleriniň pugtalandyrylmagy özara haryt dolanyşygynyň durnukly artmagy we uzak möhletleýin maýa goýum hyzmatdaşlygynyň ösdürilmegi üçin täze mümkinçilikleri açýar.