Aşgabat — Türkmenabat awtomobil ýoluny çäge sürüşmelerinden goramak boýunça täze ylmy barlaglar geçirilýär
Amul Info ·
Türkmenistanyň Milli çöller institutynyň hünärmenleri Aşgabat — Türkmenabat trassasynyň çägindäki çägeli ýerleri öwrenmek we ýoly ekologik usullar bilen berkitmek üçin güýz ekspedisiýalaryna başladylar.
Türkmenistanyň Milli çöller institutynyň hünärmenleri güýz möwsümindäki meýdan ekspedisiýalaryna başladylar. Häzirki ylmy barlaglaryň esasy ugurlarynyň biri Aşgabat — Türkmenabat awtomobil ýolunyň çägeli böleklerinden geçýän ýerleriniň ýagdaýyny öwrenmekden ybaratdyr. Hünärmenler ýol düşegine howp salýan çäge süýşmelerini, ýeliň täsirini we ýoluň howpsuzlygyny üpjün etmegiň ylmy-amaly usullaryny işläp düzýärler.
Çägini berkitmegiň ekologik taýdan arassa usullarynyň biri hem fitoremediýa, ýagny çöl ösümliklerini gamyşdan ýasalan ýörite öýjükleriň arasyna ekmekdir. Bu usul ýel arkaly çägäniň hereketini kemeltmäge mümkinçilik berýär. Aşgabat — Türkmenabat awtomagistraly ýurdumyzyň gündogar sebitini paýtagt bilen birikdirýän möhüm ulag geçelgesi bolandygy üçin, bu ylmy barlaglar Lebap welaýaty bilen ulag gatnawynyň ygtybarlylygynda uly ähmiýete eýedir.