Türkmenistanyň nebitgaz uniwersiteti Ýaponiýa bilen wodorod energetikasy boýunça hyzmatdaşlygy ösdürýär
Amul Info ·
Türkmenistanyň Ýagşygeldi Kakaýew adyndaky Halkara nebit we gaz uniwersitetiniň wekiliýeti Ýaponiýa amala aşyran saparynyň dowamynda Sýukuba uniwersitetiniň, METI-niň we NEDO-nyň wekilleri bilen duşuşdy. Gepleşiklerde wodorod tehnologiýalaryny ösdürmek, tebigy gazdan wodorod öndürmek, bilelikdäki…
Türkmenistanyň Ýagşygeldi Kakaýew adyndaky Halkara nebit we gaz uniwersitetiniň wekiliýeti Ýaponiýa iş saparyny amala aşyrdy. Saparyň dowamynda ylmy-bilim gatnaşyklaryny pugtalandyrmak, ýaşyl energetika ulgamynda bilelikdäki taslamalary durmuşa geçirmek we wodorod tehnologiýalary boýunça ýokary hünärli işgärleri taýýarlamak meselelerine garaldy.
Saparyň maksatnamasynyň çäklerinde Türkmenistanyň wekiliýeti Sýukuba uniwersitetiniň prezidenti Keýsuke Nagata bilen duşuşdy. Gepleşiklerde bilelikdäki ylmy-barlag işlerini ýola goýmak, ýokary hünärli inženerleri taýýarlamak we tebigy gazdan wodorod öndürmegiň öňdebaryjy tehnologiýalaryny işläp taýýarlamak meseleleri ara alnyp maslahatlaşyldy.
Bu hyzmatdaşlyk 2025-nji ýylyň 7-nji aprelinde Türkmenistanyň Bilim ministrligi bilen Sýukuba uniwersitetiniň arasynda gol çekilen özara düşünişmek hakyndaky Ähtnamanyň çäklerinde ösdürilýär. Resminama Türkmenistanyň Prezidentiniň Ýaponiýa amala aşyran saparynyň öňüsyrasynda baglaşyldy.
Türkmenistanyň wekiliýeti Ýaponiýanyň Ykdysadyýet, söwda we senagat ministrliginiň (METI) ýanyndaky Tebigy serişdeler we energetika agentliginiň, şeýle hem Täze energetika we senagat tehnologiýalaryny ösdürmek guramasynyň (NEDO) ýolbaşçylary bilen birnäçe duşuşyklary geçirdi.
Saparyň maksatnamasyna «Chiyoda» korporasiýasynyň Kiyasu Research Park ylmy-barlag merkeziniň, Sýukuba uniwersitetiniň Wodorod baglanyşyklaryny öwreniş merkeziniň (HBRC) we TIAR ylmy-barlag institutynyň öňdebaryjy işläp taýýarlamalary bilen tanyşmak hem girizildi.
Gepleşiklerde hünärmenleri taýýarlamak meselesine aýratyn üns berildi. Häzirki wagtda Türkmenistanyň öňdebaryjy ýokary okuw mekdepleriniň üç mugallymy Ýaponiýanyň Halkara hyzmatdaşlyk agentliginiň (JICA) goldawy bilen amala aşyrylýan «Durnukly ösüş maksatlary boýunça ählumumy lider» (SDGs Global Leader) maksatnamasynyň çäklerinde Sýukuba uniwersitetinde hünär kämilleşdiriş okuwlaryny geçýärler.
Bu sapar Türkmenistanyň we Ýaponiýanyň ýokary okuw mekdepleriniň arasyndaky ylmy-bilim hyzmatdaşlygyny giňeltmäge, wodorod energetikasy boýunça tejribe alyşmaga hem-de ýaşyl energetika ulgamynda täze tehnologiýalary ösdürmäge gönükdirilendir.