Ata Atdaýew özbegistanly garşydaşyny birinji raundda nokaut edip, professional karýerasyndaky 8-nji ýeňşini gazandy
Amul Info ·
Türkmenistanyň MMA türgeni Ata Atdaýew Abu-Dabide geçirilen «UAE Warriors» ligasynyň çäklerindäki tutluşykda özbegistanly Behzod Abdurahimowy birinji raundda nokaut etdi. 57 kilograma çenli agram derejesinde gazanylan bu ýeňiş türkmen türgeniniň professional karýerasyndaky sekizinji üstünligi boldy.
Türkmenistanly garyşyk başa-baş söweş sungatynyň (MMA) wekili Ata Atdaýew «UAE Warriors» ligasynyň çäklerinde geçirilen nobatdaky tutluşykda ýeňiş gazandy. Abu-Dabi şäherinde geçirilen ýaryşda 57 kilograma çenli agram derejesinde çykyş eden türkmen türgeni özbegistanly Behzod Abdurahimowy birinji raundda nokaut etdi. Bu barada MilliInfo habar berýär.
Tutluşygyň ilkinji minutlaryndan başlap, işjeň hereket eden Ata Atdaýew garşydaşyna güýçli zarba urup, söweşi möhletinden öň tamamlamagy başardy. Türkmen türgeniniň çep tarapdan geçiren netijeli urgusy özbegistanly türgeniň garşylyk görkezmek mümkinçiligini aradan aýyrdy.
Atdaýewiň bu söweşe taýýarlyk döwründe tälimçisi Soltan Pirgulyýew bilen taktiki usullaryň üstünde aýratyn işländigi bellenilýär. Çep tarapdan geçirilen urgularyň netijeliligi hem türgeniň taýýarlygynyň möhüm bölegi boldy.
Dzýudo boýunça hem tejribesi bolan Ata Atdaýewiň dürli söweş usullaryny utgaşdyrmagy onuň oktagondaky mümkinçiliklerini görkezýär. Ol öň türgenleşiklerini Abdulmanap Nurmagomedowyň söweş zalynda hem geçiripdi.
Bu ýeňiş bilen Ata Atdaýew professional MMA karýerasyndaky sekizinji ýeňşini gazandy. Türkmen türgeni mundan ozal hem halkara derejesindäki ýaryşlarda üstünlik gazanyp, Halkara garyşyk söweş sungatlary federasiýasynyň (IMMAF) dünýä we Ýewropa çempionatlarynda ýeňiji bolupdy.
Ata Atdaýewiň «UAE Warriors» ligasynda gazanan bu üstünligi onuň professional sport ýolundaky möhüm netijeleriň biri boldy. Türkmen türgenine geljekki tutluşyklarynda hem üstünlik arzuw edýäris.