Kerimowlaryň maşgalasy 8 gektardan 35 tonna golaý pagta ýygnady
Amul Info · · kerki, lebap
Lebap welaýatynyň Kerki etrabynyň «Azatlyk» daýhan birleşiginde zähmet çekýän Kerimowlaryň maşgalasy 8 gektar kärende ýerinden 35 tonna golaý pagta ýygnady. Maşgalanyň dört agzasy — Şöhrat Kerimow, onuň ogly Döwletgeldi, gelni Şeker we ejesi Güljemile daýza — oba hojalyk işlerini agzybirlikde alyp…
Lebap welaýatynyň Kerki etrabynyň «Azatlyk» daýhan birleşiginde zähmetsöýer kärendeçiler bol hasyl ýetişdirmekde görelde görkezýärler. Şolaryň hatarynda 8 gektar kärende ýerinden 35 tonna golaý pagta ýygnan Kerimowlaryň maşgalasy hem bar.
Daýhan birleşiginiň tejribeli topar ýolbaşçysy Atamyrat Atanyýazow öňdebaryjy kärendeçiler barada gürrüň berende, ilki bilen şu maşgalany ýatlaýar. Kerimowlaryň kärende meýdanyndaky gowaçalaryň ýagdaýy hem olaryň yhlasly zähmetiniň netijesini aýdyň görkezýär. Boýy bir metrden geçýän gowaça düýpleriniň köpüsinde 40-a golaý körek we beýleki hasyl elementleri bar. Şu wagta çenli olaryň diňe 8–10 hanasy ýygnalyp, meýdanda entek ýygnalmaly pagta köp.
Maşgalanyň dört agzasy — Şöhrat Kerimow, onuň ogly Döwletgeldi, gelni Şeker we ejesi Güljemile daýza — kärende işlerini agzybirlikde alyp barýarlar. Her biriniň ýerine ýetirmeli işleri öňünden kesgitlenýär. Oba hojalygy boýunça ýörite bilim alan Şöhrat Kerimow hem ejesiniň köpýyllyk tejribesine daýanýar.
Güljemile daýza kärende meýdanyna baranda, gowaçalaryň ýagdaýyny synlap, haýsy ýerleriň suwa mätäçdigini, nirede dökün bermelidigini kesgitleýär. Ol toplan tejribesini indi agtygy Döwletgeldä hem öwredýär. Şeýlelikde, maşgalada ekerançylygyň inçe syrlary nesilden-nesle geçirilýär.
Kerimowlaryň maşgalasy gowaça ideginde organiki we mineral dökünleri utgaşdyrmaga hem aýratyn üns berýär. Olar karbamidi ders çüýrüntgisi bilen bilelikde ulanýarlar. Meýdanyň gyrasyndaky okaryga ýerleşdirilen ders suw arkaly kärende ýeriniň dürli böleklerine ýetirilýär.
Kärendeçileriň zähmete yhlasy, tejribä daýanýan işleri we maşgala agzybirligi her ýyl bol hasyl almaga ýardam berýär. Kerimowlaryň mysaly oba hojalygynda netijeli zähmet çekmegiň we topraga jogapkärçilikli çemeleşmegiň ähmiýetini görkezýär.