Türkmenistanyň aragatnaşyk ministri Dohada geçirilen forumda sanly hyzmatdaşlygyň ileri tutulýan ugurlaryny kesgitledi
Amul Info ·
Türkmenistanyň aragatnaşyk ministri Hajymyrat Hudaýgulyýew Dohada geçirilýän Halkara elektrik aragatnaşyk birleşiginiň PP-26 maslahatynda çykyş edip, ýurdumyzyň sanly ösüşdäki gazananlaryny we halkara hyzmatdaşlygyň ileri tutulýan ugurlaryny beýan etdi. Çykyşda 5G tehnologiýalary, elektron hökümet,…
Türkmenistanyň aragatnaşyk ministri Hajymyrat Hudaýgulyýew Dohada geçirilýän Halkara elektrik aragatnaşyk birleşiginiň 2026-njy ýyldaky Doly ygtyýarly wekilleriniň maslahatynda (PP-26) çykyş etdi. Ol öz çykyşynda ýurdumyzyň sanly özgertmeler ulgamynda gazanan üstünlikleri barada maglumat berip, telekommunikasiýalar boýunça halkara hyzmatdaşlygy ösdürmegiň geljekki ugurlaryny beýan etdi.
Ministriň bellemegine görä, 2022-nji ýylda Halkara elektrik aragatnaşyk birleşiginiň öňki Doly ygtyýarly wekilleriniň maslahaty geçirilenden bäri Türkmenistan milli sanly ykdysadyýeti ösdürmek konsepsiýasyny durmuşa geçirmekde uly ösüşleri gazandy.
Häzirki wagtda ýurtda ýokary tizlikli internetiň elýeterliligi giňeldilýär, optiki-süýümli aragatnaşyk ulgamlary döwrebaplaşdyrylýar, häzirki zaman maglumatlary gaýtadan işleýän merkezler döredilýär. Şeýle hem bäşinji nesil (5G) ykjam aragatnaşyk tehnologiýalary, elektron hökümet ulgamy we sanly maliýe hyzmatlary ösdürilýär. Aýratyn-da, ýurdumyzyň uzakdaky sebitlerinde ýaşaýan ilaty döwrebap aragatnaşyk serişdeleri bilen üpjün etmeklige uly ähmiýet berilýär.
Türkmenistanyň sanly ösüşinde milli «TürkmenÄlem 52.0°E» emeli aragatnaşyk hemrasynyň mümkinçiliklerinden peýdalanmak möhüm ugurlaryň biri hökmünde görkezildi. Ministriň aýtmagyna görä, bu hemra ygtybarly aragatnaşygy, teleýaýlym gepleşikleriniň ýaýlyma berilmegini we maglumatlaryň geçirilmegini üpjün edýär. Türkmenistan hemra aragatnaşygy boýunça toplan tejribesini halkara hyzmatdaşlary bilen paýlaşmaga, şeýle hem milli hemra mümkinçilikleriniň esasynda täjirçilik we infrastruktura hyzmatlaryny hödürlemäge taýýardyr.
Hajymyrat Hudaýgulyýew çykyşynda Arkadag şäheriniň gurluşygyna we onuň sanly çözgütler bilen üpjün edilişine hem aýratyn ünsi çekdi. Türkmenistanyň ilkinji «akylly şäheri» bolan Arkadag şäheri «Smart City» konsepsiýasynyň esasynda gurlup, onda ekologiýa taýdan arassa tehnologiýalar, emeli aň we zatlaryň interneti (IoT) giňden ulanylýar. Şunuň bilen baglylykda, Türkmenistan innowasion şäherleri taslamak, gurmak we dolandyrmak boýunça halkara tejribäni öwrenmäge hem-de öňdebaryjy çözgütleri alyşmaga gyzyklanma bildirýär.
Global sanly ösüşiň geljegi barada durup geçmek bilen, ministr Türkmenistanyň Halkara elektrik aragatnaşyk birleşiginiň 2028–2031-nji ýyllar üçin Strategik meýilnamasynyň taslamasyny goldaýandygyny tassyklady. Ählumumy aragatnaşyk elýeterliligini üpjün etmek, sanly deňsizligi azaltmak we durnukly sanly özgertmeleri çaltlandyrmak ykdysady ösüşiň hem-de durmuş taýdan ilerlemegiň möhüm şertleri hökmünde görkezildi.
Halkara hyzmatdaşlygyň ileri tutulýan ugurlarynyň hatarynda sebitde üstaşyr telekommunikasiýa mümkinçiliklerini ösdürmek hem agzaldy. Türkmenistanyň Ýewraziýanyň möhüm logistika ugurlarynyň çatrygynda ýerleşmegi halkara sanly aragatnaşyk ulgamlaryny ösdürmek üçin giň mümkinçilikleri döredýär.
Häzirki wagtda ýurtda serhetüsti optiki-süýümli aragatnaşyk liniýalaryny çekmek boýunça iri taslamalar amala aşyrylýar. Türkmen tarapy telekommunikasiýa infrastrukturasyny ösdürmek, kiberhowpsuzlygy üpjün etmek we emeli aň tehnologiýalaryny ornaşdyrmak ugurlarynda täze hyzmatdaşlyklara açykdygyny hem beýan etdi.
Çykyşynyň dowamynda ministr Halkara elektrik aragatnaşyk birleşiginiň halkara standartlaryny utgaşdyrmakda, radioýygylyk spektrinden peýdalanmagy sazlaşdyrmakda we ösüp barýan döwletlere tehniki taýdan ýardam bermekde möhüm orun eýeleýändigini belledi. Birleşigiň agza döwletler bilen hyzmatdaşlygyny mundan beýläk-de pugtalandyrmagyň döwrebap we ähli gatlaklar üçin elýeterli sanly çözgütleriň giňden ornaşdyrylmagyna ýardam berjekdigi nygtaldy.
Maslahatyň ahyrynda Hajymyrat Hudaýgulyýew Türkmenistanyň Halkara elektrik aragatnaşyk birleşiginiň strategik maksatlaryna we ýörelgelerine ygrarlydygyny tassyklap, howpsuz, elýeterli we durnukly sanly geljegi kemala getirmek ugrunda halkara hyzmatdaşlygy giňeltmäge taýýardygyny aýtdy.