Astana şäherinde Ulag hepdeligi we TransLogistica Kazakhstan 2026 sergisi geçirilýär
Amul Info · · g1526273
14–16-njy oktýabrda Gazagystanyň paýtagty Astanada Ulag hepdeligi we 29-njy halkara «TransLogistica Kazakhstan 2026» sergisi geçirilýär. Çäre dünýäniň 20-den gowrak ýurdundan ulag-logistika pudagynyň wekillerini bir ýere jemledi. Sergide Ýewraziýanyň ulag geçelgelerini ösdürmek, Hazar deňziniň üsti…
14–16-njy oktýabr aralygynda Gazagystanyň paýtagty Astana şäherinde Gazagystanyň Ulag hepdeligi geçirilýär. Onuň esasy wakalarynyň biri ulag we logistika ulgamyna bagyşlanan 29-njy halkara «TransLogistica Kazakhstan 2026» sergisidir. Çäre dünýäniň 20-den gowrak ýurdundan ulag-logistika pudagynyň wekillerini bir ýere jemledi.
Bu ýylky sergä Merkezi Aziýanyň, Ýewropanyň, Ýakyn Gündogaryň we Günorta Kawkazyň ýurtlaryndan 200-den gowrak kompaniýanyň gatnaşmagyna garaşylýar. Gatnaşyjylaryň arasynda Türkmenistanyň hem bolmagy ýurduň üstaşyr ulag mümkinçiliklerini, logistika infrastrukturasyny we multimodal ulag geçelgelerini halkara derejesinde tanyşdyrmak üçin ähmiýetlidir.
Serginiň üç güne niýetlenen iş maksatnamasynyň çäklerinde ulag we logistika pudagynyň hünärmenleri Ýewraziýa boýunça ulag ugurlaryny ösdürmek, halkara ýük daşamalarynyň netijeliligini ýokarlandyrmak we üpjünçilik zynjyrlaryny döwrebaplaşdyrmak meselelerini ara alyp maslahatlaşýarlar.
Esasy üns berilýän ugurlaryň biri hem Ýewraziýanyň ulag geçelgelerini ösdürmek, şol sanda Hazar deňziniň üsti bilen geçýän Orta geçelgäniň (Middle Corridor) mümkinçiliklerinden peýdalanmakdyr. Şeýle hem senagat we energetika taslamalary üçin logistika çözgütlerini kämilleşdirmek, maglumat tehnologiýalaryny, emeli aňy we awtomatlaşdyryş ulgamlaryny ýük daşamak işlerine ornaşdyrmak meselelerine garalýar.
Forumyň gün tertibinde Awaza hereketler maksatnamasynyň çäklerinde durnukly awtomobil ulagyny we üstaşyr gatnawlary ösdürmek boýunça başlangyçlar hem möhüm orun eýeleýär.
«TransLogistica Kazakhstan 2026» sergisiniň çäklerinde ulag edaralarynyň, halkara kompaniýalaryň we pudaklaýyn bilermenleriň gatnaşmagy Ýewraziýa yklymynda netijeli, howpsuz we döwrebap ulag infrastrukturasyny döretmekde halkara hyzmatdaşlygynyň ähmiýetini görkezýär.
Türkmenistanyň bu ugurda alyp barýan işleri hem halkara ulag geçelgelerini ösdürmek, sebitleýin logistika ulgamyndaky ornuny berkitmek we halkara ýük daşamalary üçin täze mümkinçilikleri döretmek bilen baglanyşyklydyr.