Walentina Matwiýenko GDA-nyň Parlamentara Assambleýasynyň Geňeşiniň başlygy wezipesine gaýtadan saýlandy
Amul Info ·

2026-njy ýylyň 19-njy noýabrynda «Awaza» milli syýahatçylyk zolagynda geçirilen mejlisde Walentina Matwiýenko GDA-nyň Parlamentara Assambleýasynyň Geňeşiniň başlygy wezipesine täze möhlete gaýtadan saýlandy. Onuň dalaşgärligini Özbegistanyň Senatynyň başlygy Tanzila Narbaýewa öňe sürdi. GDA…
Garaşsyz Döwletleriň Arkalaşygyna (GDA) gatnaşyjy döwletleriň Parlamentara Assambleýasynyň Geňeşi Walentina Matwiýenkony täze möhlete Geňeşiň başlygy wezipesine gaýtadan saýlady. Degişli çözgüt 2026-njy ýylyň 19-njy noýabrynda «Awaza» milli syýahatçylyk zolagynda geçirilen mejlisde kabul edildi. Bu barada GDA-nyň Ýerine ýetiriji komitetiniň resmi saýty habar berýär.
Walentina Matwiýenkonyň dalaşgärligini Özbegistanyň Oliý Majlisiniň Senatynyň başlygy Tanzila Narbaýewa öňe sürdi. Ol Russiýa Federasiýasynyň Federal Ýygnagynyň Federasiýa Geňeşiniň başlygynyň Assambleýanyň abraýyny ýokarlandyrmakda, netijeli dialogy ösdürmekde, parlamentleriň arasynda özara hormat goýmak we deňhukukly hyzmatdaşlyk ýörelgelerini berkitmekde uly goşant goşandygyny belledi.
Tanzila Narbaýewanyň aýtmagyna görä, Walentina Matwiýenkonyň döwlet dolandyryşyndaky baý tejribesi we hünär ussatlygy netijesinde GDA-nyň Parlamentara Assambleýasy köptaraplaýyn parlament hyzmatdaşlygynyň möhüm meýdançasy hökmünde öz ornuny pugtalandyrýar. Onuň ýolbaşçylygynda nusgalyk kanun çykaryjylyk işi ösdürilýär, parlamentara hyzmatdaşlygyň usullary kämilleşdirilýär, durmuş, ykdysadyýet we ynsanperwer ulgamlardaky gatnaşyklar giňeldilýär.
Özbegistanyň Senatynyň başlygy Assambleýanyň işinde hyzmatdaşlygyň däplerini dowam etdirmek bilen bir hatarda, täze amaly mazmunyň hem döredilýändigini nygtady. Şeýle hem ol Matwiýenkonyň GDA ýurtlarynyň parlamentleriniň başlangyçlaryna we garaýyşlaryna ünsli çemeleşýändigini, özara kabul ederlikli çözgütleri gözlemäge taýýardygyny belledi.
Gazagystanyň Gurlutaýynyň başlygy Aýbek Dadabaý hem Walentina Matwiýenkonyň işjeň gatnaşmagynda Arkalaşygyň ýurtlarynyň arasyndaky parlamentara hyzmatdaşlygyň geriminiň we mazmunynyň has-da baýlaşandygyny aýtdy. Onuň bellemegine görä, Assambleýanyň çäklerinde nusgalyk kanun çykaryjylyk işi netijeli häsiýete eýe bolup, GDA döwletleriniň parlament wekilleriniň gatnaşmagynda bilelikdäki çäreleri geçirmek tejribesi giňeldi.
Azerbaýjanyň Milli Mejlisiniň başlygy Sahiba Gafarowa bolsa Walentina Matwiýenkonyň ýolbaşçylygynda Assambleýanyň geljekde-de açyk dialog we sebitleýin meseleleri ara alyp maslahatlaşmak üçin abraýly meýdança bolmagyny dowam etdirjekdigine ynam bildirdi.
Walentina Matwiýenko özüne bildirilen gaýtadan ynam üçin Geňeşiň agzalaryna minnetdarlyk bildirdi.