Gyrgyzystan Türkmenistandan mineral dökünleri satyn almaga gyzyklanma bildirýär
Amul Info ·

Gyrgyzystanyň Ministrler Kabinetiniň Başlygynyň orunbasary Erlist Akunbekow bilen Türkmenistanyň oba hojalyk ministri Çaryýar Çetiýewiň arasynda geçirilen duşuşykda oba hojalygy boýunça hyzmatdaşlygy ösdürmegiň mümkinçilikleri ara alnyp maslahatlaşyldy. Taraplar gurakçylyga çydamly üzüm sortlaryny…
Türkmenistana iş sapary bilen gelen Gyrgyz Respublikasynyň Ministrler Kabinetiniň Başlygynyň orunbasary, suw serişdeleri, oba hojalygy we gaýtadan işleýän senagaty boýunça ministr Erlist Akunbekow Türkmenistanyň oba hojalyk ministri Çaryýar Çetiýew bilen duşuşdy. Bu barada Gyrgyzystanyň Ministrler Kabinetiniň metbugat gullugy habar berdi.
Duşuşykda iki ýurduň arasynda oba hojalyk pudagyndaky hyzmatdaşlygy ösdürmegiň mümkinçilikleri ara alnyp maslahatlaşyldy we geljekki hyzmatdaşlygyň ileri tutulýan ugurlary kesgitlenildi.
Taraplar Gyrgyzystanyň howa şertlerine laýyk gelýän gurakçylyga çydamly üzüm sortlaryny ösdürip ýetişdirmekde Türkmenistanyň tejribesini ornaşdyrmak, ýyladyşhana hojalygyny ösdürmek, miwe-ir-iýmişleri we gök ekinleri ýetişdirmek boýunça bilelikdäki ylmy-amaly barlaglary geçirmek meselelerine garadylar.
Gepleşiklerde organiki oba hojalygyny ösdürmäge hem aýratyn üns berildi. Bu ugurda organiki önümçiligiň möçberini artdyrmak, sertifikatlaşdyrmak ulgamyny kämilleşdirmek, önümleri daşary ýurt bazarlaryna çykarmak, şeýle-de olary gaýtadan işlemek, saklamak we gaplamak üçin döwrebap tehnologiýalary ornaşdyrmak boýunça pikir alşyldy.
Şeýle-de iki ýurduň oba hojalyk telekeçileriniň arasynda göni işewür gatnaşyklary ýola goýmagyň ähmiýeti bellenildi. Şunuň bilen baglylykda, oba hojalyk haryt öndürijileriniň we gaýtadan işleýän kärhanalaryň gatnaşmagynda ikitaraplaýyn işewür duşuşyklary geçirmek mümkinçiligi ara alnyp maslahatlaşyldy.
Duşuşygyň dowamynda Erlist Akunbekow Gyrgyzystanyň Türkmenistanda öndürilýän ýokary hilli mineral dökünleri özara bähbitli şertlerde we bäsdeşlige ukyply bahalardan göni satyn almaga gyzyklanma bildirýändigini aýtdy.
Duşuşygyň netijesinde taraplar oba hojalygy boýunça hyzmatdaşlygy mundan beýläk-de ösdürmek, tejribe alyşmak we özara gyzyklanma bildirilýän bilelikdäki taslamalary durmuşa geçirmek babatda gatnaşyklary işjeňleşdirmäge taýýardyklaryny tassykladylar.