Samarkantda çagalaryň abadançylygyna bagyşlanan bütindünýä sammiti geçiriler
Amul Info ·
2026-njy ýylyň 21–22-nji oktýabrynda Özbegistanyň Samarkant şäherinde çagalaryň abadançylygyna we geljegine bagyşlanan halkara sammiti geçiriler. «Çagalaryň abadançylygyna maýa goýumlary: geljekki nesiller üçin durnukly we adyl ösüşe tarap» atly forumda dünýäniň ýüzden gowrak döwletinden wekilleriň…
Özbegistanyň Samarkant şäherinde 2026-njy ýylyň 21–22-nji oktýabrynda çagalaryň abadançylygyna we geljegine bagyşlanan Bütindünýä sammiti geçiriler. «Çagalaryň abadançylygyna maýa goýumlary: geljekki nesiller üçin durnukly we adyl ösüşe tarap» atly halkara forum dünýäniň ýüzden gowrak döwletinden wekilleri bir ýere jemlär.
Abraýly halkara duşuşygyna syýasy liderleriň, ministrleriň, halkara guramalarynyň wekilleriniň, şeýle hem durmuş üpjünçiligi, saglygy goraýyş we bilim ulgamlarynyň hünärmenleriniň gatnaşmagyna garaşylýar.
Sammitiň esasy maksady çagalaryň sagdyn ösmegi, ýokary hilli bilim almagy, durmuş taýdan goraglylygynyň üpjün edilmegi we olaryň hemmetaraplaýyn ösüşi bilen baglanyşykly möhüm meseleleri ara alyp maslahatlaşmakdan ybaratdyr.
Forumyň dowamynda ýaş nesliň abadançylygyny ýokarlandyrmak, çagalar üçin deň mümkinçilikleri döretmek hem-de geljekki nesilleriň bähbidine gönükdirilen durnukly ösüşi üpjün etmek boýunça garaýyşlaryň we tejribeleriň paýlaşylmagyna aýratyn ähmiýet berler.
Sammit çagalaryň hukuklaryny we bähbitlerini goramak, olaryň ýaşaýyş şertlerini gowulandyrmak hem-de bu ugurda halkara hyzmatdaşlygyny ösdürmek üçin möhüm meýdança bolar.