Hytaýyň Alashankou şäherinde täze logistika merkezi döredilýär: Türkmenistan bilen söwda gatnaşyklary üçin täze mümkinçilikler
Amul Info ·
Hytaýyň Alashankou serhet geçelgesinde täze halkara logistika merkeziniň gurluşygy başlandy. Taslama Hytaý bilen Merkezi Aziýanyň, şol sanda Türkmenistanyň arasyndaky ýük daşamalarynyň möhletini 3–5 gün gysgaltmaga we çykdajylary azaltmaga gönükdirilendir. Täze merkez türkmen telekeçilerine Hytaý…
Hytaý bilen Merkezi Aziýa ýurtlarynyň, şol sanda Türkmenistanyň arasyndaky ýük daşamalarynyň tizligini ýokarlandyrmak maksady bilen, Hytaýyň Alashankou serhet geçelgesinde iri halkara logistika merkeziniň gurluşygyna başlandy. Täze merkez demir ýol arkaly amala aşyrylýan ýük daşamalarynyň möhletini 3–5 gün gysgaltmaga we ulag-logistika çykdajylaryny azaltmaga mümkinçilik berer.
Sichuan Port Investment topary tarapyndan maýa goýulýan bu taslama Hytaýyň günbataryna tarap halkara ulag we söwda geçelgesini ösdürmegiň möhüm bölegi bolup durýar. Ol ýurduň senagat taýdan ösen sebitleriniň biri bolan Siçuan welaýatyny Merkezi Aziýa bazarlary bilen has netijeli baglanyşdyrmagy maksat edinýär. Bu barada «Sichuan Daily» neşiri habar berýär.
Taslamanyň Türkmenistan üçin ähmiýeti hem uludyr. 2026-njy ýylyň başyndan bäri Çendu şäherinden Merkezi Aziýa ugruna amala aşyrylýan demir ýol ýük daşamalarynyň möçberi dört esse artdy. Şol bir wagtyň özünde, Türkmenistanyň ugry boýunça ýene iki sany täze göni ýük gatnaw ugry ýola goýuldy.
Bu ugurlar arkaly Türkmenistana täze energiýa çeşmelerinde işleýän awtoulaglar, fotoelektrik energiýa ulgamlary, energiýany saklaýjy enjamlar, elektronika önümleri hem-de maşyn gurluşygy pudagyna degişli enjamlar iberilýär.
Alashankou şäherinde gurulýan täze logistika merkeziniň esasy aýratynlyklarynyň biri Hytaýyň we Merkezi Aziýanyň demir ýol relsleriniň ölçeg tapawudyna garamazdan, konteýnerleri düşürip-gaýtadan ýüklemezden geçirmek mümkinçiliginiň döredilmegidir. Bu usul köpugurly ulag ulgamy we gümrük ammarlary bilen utgaşdyrylar. Netijede, ýükleriň üstaşyr daşalyş wagtyny 3–5 gün azaltmak, şeýle hem logistika çykdajylaryny peseltmek göz öňünde tutulýar.
Çendu şäherindäki terminallaryň, Alashankoudaky serhet logistika merkeziniň we sebitdäki ýük paýlaýjy bazalaryň özara utgaşdyrylmagy üznüksiz üpjünçilik ulgamynyň kemala gelmegine şert döreder. Bu bolsa türkmen telekeçileri we halkara söwda kompaniýalary üçin Hytaý bilen söwda gatnaşyklaryny giňeltmäge, harytlary has çalt we amatly şertlerde daşamaga täze mümkinçilikleri açar.