Türkmenistan bilen Pakistanyň arasyndaky bilelikdäki taslamalary durmuşa geçirmek boýunça ädimler maslahatlaşyldy
Amul Info ·
Türkmenistanyň Pakistandaky ilçisi Atajan Mawlamow bilen Pakistanyň Daşary işler ministrliginiň wekili Hasan Ali Zaýgamyň arasynda duşuşyk geçirildi. Gepleşiklerde ozal gazanylan ylalaşyklary durmuşa geçirmek, bilelikdäki taslamalary ilerletmek we ykdysady hem-de infrastruktura ugurlaryndaky…
Pakistanyň Daşary işler ministrliginde Türkmenistanyň Pakistandaky Adatdan daşary we Doly ygtyýarly ilçisi Ata jan Mawlamow bilen Merkezi Aziýa ýurtlary we Ykdysady Hyzmatdaşlyk Guramasy (YHG) boýunça departamentiň baş direktory Hasan Ali Zaýgamyň arasynda duşuşyk geçirildi. Gepleşikleriň dowamynda iki ýurduň arasynda gazanylan ylalaşyklary durmuşa geçirmek we bilelikdäki taslamalary anyk ykdysady hem-de infrastruktura netijelerine öwürmek meseleleri ara alnyp maslahatlaşyldy.
Duşuşykda türkmen diplomatik wekilhanasynyň ýolbaşçysy pakistan tarapyny oktýabr aýynyň başynda «Awaza» milli syýahatçylyk zolagynda geçirilen halkara forumlaryň netijeleri bilen tanyşdyrdy. Aşgabat tarapyndan öňe sürlen başlangyçlaryň köptaraplaýyn hyzmatdaşlygy giňeltmäge, ulag-energetika arabaglanyşygyny pugtalandyrmaga we sebitde durnukly ösüşi üpjün etmäge gönükdirilendigi bellenildi.
Pakistanyň diplomaty Türkmenistanyň halkara gepleşikler üçin möhüm meýdançalary guramakdaky işjeň ornuna ýokary baha berdi. Ol şeýle forumlaryň Merkezi we Günorta Aziýa ýurtlarynyň arasynda özara düşünişmegi çuňlaşdyrmakda möhüm ähmiýete eýedigini nygtady.
Taraplar ikitaraplaýyn hyzmatdaşlygyň ileri tutulýan ugurlary boýunça pikir alyşdylar. Şeýle hem strategik ähmiýetli bilelikdäki taslamalaryň durmuşa geçirilişini çaltlandyrmak maksady bilen, hünärmenleriň derejesinde we ýokary derejeli duşuşyklary dowam etdirmek boýunça geljekki aragatnaşyklaryň tertibini ylalaşdylar.
Duşuşyk Türkmenistan bilen Pakistanyň arasyndaky ykdysady, ulag we energetika ulgamlaryndaky hyzmatdaşlygy ösdürmek hem-de ozal gazanylan ylalaşyklaryň amaly netijelerini üpjün etmek ugrunda möhüm ädim hökmünde ähmiýetlidir.