KGK-nyň halkara habarlar agentligini döretmek başlangyjy öňe sürüldi
Amul Info ·
Türkiýäniň Alanýa şäherinde geçirilen 6-njy Global media duşuşygynda Küresel Gazeteciler Konseýiniň halkara habarlar agentligini döretmek başlangyjy öňe sürüldi. 32 döwletden 350 žurnalisti bir ýere jemlän çärä Türkmenistanyň wekili Döwran Orazgylyjow hem gatnaşdy. Duşuşykda halkara media…
Türkiýäniň Alanýa şäherinde geçirilýän 6-njy Global media duşuşygynyň çäklerinde Küresel Gazeteciler Konseýiniň (KGK) halkara habarlar agentligini döretmek baradaky teklibi öňe sürüldi. Bu başlangyç dürli ýurtlaryň habar beriş serişdeleriniň arasyndaky hyzmatdaşlygy giňeltmäge we halkara maglumat alyş-çalşygyny has-da ösdürmäge gönükdirilendir.
Bu mesele Halkara media geňeşiniň agzalarynyň we dürli ýurtlardan gelen köpçülikleýin habar beriş serişdeleriniň wekilleriniň gatnaşmagynda geçirilen duşuşykda ara alnyp maslahatlaşyldy. Çärä KGK-nyň başlygy Mehmet Ali Dim, Halkara media geňeşiniň agzalary hem-de halkara žurnalistler gatnaşdylar.
Duşuşykda halkara media hyzmatdaşlygyny pugtalandyrmak, žurnalistleriň arasynda maglumat we tejribe alyşmagyň mümkinçiliklerini giňeltmek, şeýle hem dürli ýurtlaryň habar beriş serişdeleriniň bilelikdäki taslamalaryny durmuşa geçirmek meselelerine garaldy.
Ara alyp maslahatlaşmalaryň esasy ugurlarynyň biri KGK-nyň halkara habarlar agentligini döretmek teklibi boldy. Bu taslamanyň durmuşa geçirilmegi dürli döwletlerde işleýän žurnalistleriň arasynda maglumat alyş-çalşygyny ýeňilleşdirmäge, halkara habarlar giňişliginde hyzmatdaşlygy ösdürmäge we media wekilleriniň arasyndaky gatnaşyklary berkitmäge mümkinçilik berer.
Duşuşykda çykyş eden halkara wekiller maglumatlaryň ygtybarlylygyny üpjün etmek, sanly tehnologiýalaryň täze mümkinçiliklerinden peýdalanmak we bilelikdäki media taslamalaryny ýola goýmak boýunça öz garaýyşlaryny hem-de tekliplerini beýan etdiler.
Maslahata Türkmenistanyň wekili hökmünde «Atavatan Media» habarlar toparynyň baş redaktory, hukuk ylymlarynyň doktory Döwran Orazgylyjow hem gatnaşdy. Ol öz çykyşynda halkara media hyzmatdaşlygyny giňeltmegiň, dürli ýurtlaryň žurnalistleriniň arasynda yzygiderli maglumat alyş-çalşygyny ýola goýmagyň we bilelikdäki başlangyçlary goldamagyň ähmiýetini nygtady.
Şeýle-de häzirki zaman žurnalistikasynda sanly tehnologiýalaryň we emeli aňyň ulanylyşy, olaryň habar taýýarlamak we maglumat ýaýratmak işine ýetirýän täsiri barada pikir alşyldy.
Alanýa şäherinde geçirilýän 6-njy Global media duşuşygyna dünýäniň 32 döwletinden 350 žurnalist we media wekili gatnaşýar. Halkara çäre dürli ýurtlaryň habar beriş serişdeleriniň arasynda tejribe alyşmak, hünär gatnaşyklaryny ösdürmek we täze hyzmatdaşlyk ugurlaryny kesgitlemek üçin möhüm meýdança bolup durýar.