Olimlar Antarktidadagi «Qiyomat muzligi» kutilganidan tezroq eriyotganidan ogohlantirmoqda
Amul Info ·
Antarktidadagi Tueyts muzligi, ko‘pincha «Qiyomat muzligi» deb ataladigan ulkan muz qatlamining erishi avvalgi taxminlardan tezroq kechmoqda. Nature Communications ilmiy jurnalida chop etilgan yangi tadqiqot natijalariga ko‘ra, bu jarayonning Jahon okeani sathining ko‘tarilishiga ta’siri ilgari…
Antarktidadagi, ko‘pincha «Qiyomat muzligi» deb ataladigan ulkan Tveyts muzligi avvalgi taxminlarga qaraganda ancha tez erimoqda. Yangi tadqiqotlar uning kelajakda Jahon okeani sathining ko‘tarilishiga qo‘shadigan hissasi ilgari hisoblanganidan kattaroq bo‘lishi mumkinligini ko‘rsatmoqda. Bu haqda «Xovar» axborot agentligi xabar berdi.
Nature Communications ilmiy jurnalida chop etilgan tadqiqotda muzlik ostida sodir bo‘layotgan o‘zgarishlarni yanada aniqroq o‘rganish imkonini beruvchi yangi usul qo‘llangani qayd etilgan. Olimlarning xulosalariga ko‘ra, muz qatlamining erishi avval taxmin qilinganidan faolroq kechishi mumkin.
Tadqiqot mualliflarining prognozlariga ko‘ra, 2100-yilga kelib Tveyts muzligining erishi Jahon okeani sathining taxminan uch santimetrga ko‘tarilishiga sabab bo‘lishi mumkin. Bu ko‘rsatkich avvalgi baholardan ikki baravar yuqori. Dengiz sathining ko‘tarilishi esa qirg‘oqbo‘yi hududlarida suv toshqinlari xavfini oshirishi mumkin.
Olimlar issiqxona gazlari chiqindilarini kamaytirishga qaratilgan choralar allaqachon boshlangan o‘zgarishlarning barcha oqibatlarini bartaraf etish uchun yetarli bo‘lmasligi mumkinligini ham ta’kidlamoqda. Ularning fikricha, muzlikning hozirgi holati kelgusida ham okean sathining ko‘tarilishiga ta’sir ko‘rsatishda davom etadi.
Tveyts muzligi Antarktidaning g‘arbiy qismida joylashgan. Uning holati Jahon okeanining kelajakdagi sathini prognoz qilishga doir ilmiy kuzatuvlarda muhim ahamiyatga ega. Shu sababli muzlikning erish sur’atlarini o‘rganish va yuzaga kelishi mumkin bo‘lgan oqibatlarni baholash xalqaro ilmiy tadqiqotlarning muhim yo‘nalishlaridan biri bo‘lib qolmoqda.