Angliýanyň ýygyndysy Ispaniýanyň ýeňlişsiz oýunlar rekordyny tamamlady

Amul Info · · g3117735

Angliýanyň ýygyndysy Ispaniýanyň ýeňlişsiz oýunlar rekordyny tamamlady

Angliýanyň milli ýygyndysy Milletler ligasynyň toparlaýyn tapgyrynda Ispaniýany 3:2 hasabynda ýeňip, garşydaşynyň 43 duşuşyk dowam eden ýeňlişsiz tapgyryny tamamlady. Madridde geçirilen oýunda Garri Keýn, Ezri Konsa we Ben Uaýt iňlisleriň gollaryny geçirdiler. Bu ýeňiş bilen Angliýa 15 utuk toplap,…

Angliýanyň futbol boýunça milli ýygyndysy Milletler ligasynyň toparlaýyn tapgyrynyň altynjy aýlawynda myhmançylykda Ispaniýanyň ýygyndysyny 3:2 hasabynda ýeňdi. Madrid şäherinde geçirilen bu duşuşyk ispanlaryň 43 oýna çeken ýeňlişsiz tapgyrynyň tamamlanmagyna sebäp boldy. Bu barada «Atavatan Türkmenistan» neşiri habar berýär.

Duşuşykda hasabyň ilkinji üýtgemegi 45-nji minutda boldy. Angliýanyň ýygyndysynyň kapitany Garri Keýn 11 metrlik jerime urgusyny dürs ýerine ýetirip, toparyny öňe çykardy. Ikinji ýarymyň 53-nji minutynda Ezri Konsa, 57-nji minutynda bolsa Ben Uaýt tapawutlandy.

Ispaniýanyň ýygyndysy oýnuň soňky böleginde garşylyk görkezmäge synanyşdy. Mikel Oýarsabal 65-nji minutda 11 metrlik jerime urgusyndan gol geçirdi, 75-nji minutda bolsa Niko Uilýams hasaby 2:3-e ýetirdi. Şeýle-de bolsa, ispanlar duşuşygyň netijesini üýtgedip bilmediler. 63-nji minutdan başlap, ýarymgoragçy Elliot Andersonyň meýdançadan çykarylmagy bilen Angliýanyň ýygyndysy oýny on futbolçy bilen dowam etdirdi.

Şeýlelikde, Ispaniýanyň milli ýygyndysynyň esasy wagtyň dowamynda ýeňlişe sezewar bolman geçiren 43 duşuşyklyk tapgyry tamamlandy. Bu milli ýygyndylaryň arasynda täze rekord hökmünde hasaba alnypdy.

Ispanlar soňky gezek 2024-nji ýylyň mart aýynda Kolumbiýa bilen geçirilen ýoldaşlyk duşuşygynyň esasy wagtynda 0:1 hasabynda ýeňlipdiler. Mundan başga-da, 2025-nji ýylyň iýunynda Milletler ligasynyň finalynda Portugaliýanyň ýygyndysyndan soňky 11 metrlik jerime urgulary boýunça asgyn gelipdiler. Emma bu duşuşykda esasy wagtyň netijesi deňlik bilen tamamlanypdy.

Resmi duşuşyklarda bolsa Ispaniýanyň ýygyndysy 2023-nji ýylyň mart aýyndan bäri 44 oýnuň dowamynda ýeňilmändi. Şol tapgyryň dowamynda onuň soňky ýeňlişi 2024-nji ýylyň Ýewropa çempionatynyň saýlama tapgyrynda Şotlandiýanyň ýygyndysyndan 0:1 hasabynda utulmagy bolupdy.

Toparlaýyn tapgyryň netijeleri boýunça Angliýanyň we Ispaniýanyň ýygyndylary hersi 15 utuk toplady. Geçirilen we öz derwezelerine goýberilen gollaryň aratapawudy boýunça has gowy görkezijä eýe bolan iňlisler Milletler ligasynyň iň ýokary diwizionynyň 3-nji toparçasynda birinji orny eýelediler. Ispaniýa ikinji boldy. Horwatiýa 6 utuk bilen üçünji, Çehiýa bolsa utuk toplamazdan dördünji orny eýeledi.

Milletler ligasynyň iň ýokary diwizionynda her toparçanyň ilkinji iki ornuny eýelän ýygyndylar çärýek finala çykýarlar. Iň pes netije görkezen iki topar indiki möwsümde ikinji diwiziona düşürilýär.

Üçünji orunlary eýelän toparlaryň arasynda iň pes netijeli iki ýygyndy, şeýle hem dördünji orunlary eýelänleriň arasynda iň gowy görkezijili iki ýygyndy ikinji diwiziona düşmezlik ugrunda geçiş duşuşyklaryna gatnaşarlar. Olar ikinji diwizionyň toparçalarynda ikinji orny eýelän ýygyndylar bilen güýç synanyşarlar.

Milletler ligasynyň häzirki çempiony Portugaliýanyň milli ýygyndysydyr.

Источник: Amul Info