Türkmenistanda iki okuwçy rus dili boýunça halkara olimpiadanyň finalyna çykdy
Amul Info ·
Türkmenistanyň ýokary synp okuwçylary Polina Klubkowa we Nurana Gubaýewa rus dili boýunça W.G. Kostomarowyň adyny göterýän XXII halkara olimpiadanyň finalyna gatnaşarlar. 13–19-njy noýabrda Moskwada geçiriljek jemleýji tapgyra 11 ýurtdan 16 okuwçy saýlanyp alyndy. Finalçylar ýazuw we dilden…
Türkmenistanyň ýokary synp okuwçylary Polina Klubkowa we Nurana Gubaýewa W.G. Kostomarowyň adyny göterýän rus dili boýunça XXII Halkara olimpiadanyň jemleýji tapgyryna gatnaşmaga hukuk gazandylar. Ýaryşyň ýüzbe-ýüz geçiriljek final tapgyry 13–19-njy noýabr aralygynda Moskwa şäherinde geçiriler.
Bu ýylky olimpiadanyň finalyna dünýäniň 11 ýurdundan 16 sany ýokary synp okuwçysy saýlanyp alyndy. Olaryň hatarynda Ermenistanyň, Belarusyň, Wýetnamyň, Gresiýanyň, Gazagystanyň, Gyrgyzystanyň, Mongoliýanyň, Serbiýanyň, Täjigistanyň, Türkmenistanyň we Özbegistanyň wekilleri bar.
Türkmenistanly okuwçylar saýlama onlaýn tapgyrynda üstünlikli çykyş edip, Puşkin adyndaky Rus dili döwlet institutynyň «Rus dilinde bilim» atly internet portalynda hödürlenen ýumuşlary ýerine ýetirdiler.
Olimpiadanyň final synaglary A.S. Puşkin adyndaky Rus dili döwlet institutynda geçiriler. Gatnaşyjylar ýazuw we dilden döredijilik ýumuşlaryny ýerine ýetirerler. Ýazuw tapgyrynda Russiýanyň taryhynyň we medeniýetiniň möhüm senelerine bagyşlanan temalar boýunça düzme ýazmak göz öňünde tutulýar. Dilden geçiriljek tapgyrda bolsa okuwçylar rus halkynyň däp-dessurlary, medeniýeti we umumy dünýägaraýşy baradaky bilimlerini açyp görkezmek üçin öňünden taýýarlanan çykyşlary bilen çykyş ederler.
Puşkin adyndaky institutyň rektory Nikita Gusewiň bellemegine görä, bu olimpiada diňe bir bäsleşik bolman, eýsem, dürli ýurtlaryň ýaşlarynyň arasynda medeniýetara dialogy ösdürmäge hem ýardam berýär. Gatnaşyjylar Moskwada bolýan wagtlarynda rus dilini kämilleşdirmek we rus medeniýeti bilen has içgin tanyşmak üçin dürli çärelerden ybarat maksatnama gatnaşarlar.
Saparyň dowamynda finalçylar institutyň hünärmenleriniň awtorlyk leksiýalaryna, «Dünýäde rus diliniň ilçileri» maksatnamasynyň meýletinçileriniň ussatlyk sapaklaryna hem-de VI Kostomarow forumynyň çärelerine gatnaşarlar. Şeýle hem olar Moskwanyň muzeýlerine baryp, şäheriň taryhy we medeni ýerleri bilen tanyşarlar.
Olimpiadanyň ýeňijilerine we baýrakly orunlara mynasyp bolanlara diplomlar gowşurylar. Bu diplomlar Puşkin adyndaky institutda goşmaça bilim maksatnamasy boýunça üç hepdelik onlaýn okuwy tölegsiz geçmäge hukuk berýär.
Daşary ýurtly mekdep okuwçylarynyň arasynda rus dili boýunça halkara olimpiada 1972-nji ýyldan bäri geçirilýär. Onuň esaslandyryjylary Puşkin adyndaky Rus dili döwlet instituty we Rus dili we edebiýaty mugallymlarynyň halkara birleşigidir. Bäsleşik «Rus dünýäsi» gaznasynyň, Russiýanyň Daşary işler ministrliginiň hem-de «Rossotrudniçestwo» guramasynyň goldawy bilen guralýar.
Olimpiadanyň finalyna gatnaşjak okuwçylaryň doly sanawy bilen resmi saýtda tanşyp bolýar.