Ashxobodda Turkman alabayining milliy bayrami keng ko‘lamda nishonlandi
Amul Info · · asgabat, ashgabat
25-oktabr kuni Ashxobodda ko‘rgazmalar, ijodiy tanlovlar hamda «Ýylyň türkmen edermen alabaýy — 2026» tanlovining final bosqichi bo‘lib o‘tdi. 🥇 Ashxobodlik kinolog A. Bakaýevning Akgaýa laqabli alabay iti tanlov g‘olibi bo‘ldi. Unga bosh mukofot — Toyota Camry avtomobili topshirildi.
25-oktabr kuni Ashxobod shahridagi Ot sporti majmuasida Turkman alabayining milliy bayrami munosabati bilan tantanali tadbirlar bo‘lib o‘tdi. Bayram tadbirlarida davlat idoralari vakillari, diplomatlar, xalqaro ekspertlar, kinologlar, «Turkman alabay itlari» xalqaro assotsiatsiyasi a’zolari hamda turkman alabayining muxlislari ishtirok etdilar.
Bayram munosabati bilan Ot sporti majmuasining asosiy xiyoboni bo‘ylab ko‘rgazma tashkil etildi. Ashxobod shahri, Arkadag shahri va mamlakat viloyatlaridan kelgan mohir ustalar turkman alabayining tasviri tushirilgan gilam mahsulotlari, rangtasvir asarlari, haykallar va zargarlik buyumlarini keng jamoatchilikka taqdim etdilar. Ko‘rgazmada xalqning milliy merosi, qadimiy an’analari hamda sadoqat ramzi hisoblangan turkman alabayiga bag‘ishlangan ijodiy ishlar alohida o‘rin egalladi.
Bayramning ahamiyatini yanada oshirgan voqealardan biri turkman alabayini ko‘paytirish va parvarishlash bilan bog‘liq an’analarning YUNESKOning Insoniyatning nomoddiy madaniy merosi ro‘yxatiga kiritilganidir. Ushbu xalqaro e’tirof turkman alabayining nafaqat milliy qadriyat, balki jahon madaniy merosining ham muhim qismi ekanini ko‘rsatadi.
Bayram dasturining asosiy voqeasi «Ýylyň türkmen edermen alabaýy — 2026» («2026-yilning jasur turkman alabayisi») tanlovining final bosqichi bo‘ldi. Hududiy saralash bosqichlaridan muvaffaqiyatli o‘tgan o‘nta alabay ochiq manejda o‘zining tana tuzilishi, mashg‘ulot darajasi, chaqqonligi, tezligi va to‘siqlardan o‘tish qobiliyatini namoyish etdi. Tanlov davomida hakamlar hay’ati itlarning o‘ziga xos xususiyatlari va tayyorgarlik darajasini baholadi.
Tanlov natijalariga ko‘ra, Ashxobodlik kinolog A. Bakayevga tegishli Akgaýa laqabli alabay «Ýylyň türkmen edermen alabaýy — 2026» faxriy unvoniga sazovor bo‘ldi. G‘olibga Turkmaniston Prezidentining bosh mukofoti sifatida Toyota Camry rusumli avtomobil kalitlari topshirildi. Shuningdek, unga o‘tish kubogi, medal va Faxriy yorliq tantanali ravishda topshirildi.
Bayram doirasida turkman alabayining obrazini san’at orqali tarannum etishga bag‘ishlangan ijodiy tanlov g‘oliblari ham taqdirlandi. Ushbu tanlovda gilamdo‘zlik, rangtasvir, haykaltaroshlik, dizayn va kinooperatorlik yo‘nalishlaridagi eng yaxshi ijodiy ishlar e’tirof etildi.
«Turkmenhaly» ishlab chiqarish birlashmasi vakili A. Gulberdiyev yaratgan gilam asari eng yaxshi ish deb topildi. Rangtasvir yo‘nalishida Turkmaniston Davlat badiiy akademiyasi talabasi S. Osmanovning «Miras» («Meros») nomli asari birinchi o‘rinni egalladi. Haykaltaroshlik yo‘nalishida esa B. Batyrovaning «Alabay madhiyasi» nomli kompozitsiyasi yuqori baholandi. Bundan tashqari, turkman alabayining o‘ziga xos qiyofasi va xarakterini badiiy ifodalagan yosh dizaynerlar hamda kinooperatorlar ham mukofotlandi.
Shu tariqa, Turkman alabayining milliy bayrami milliy an’analar, san’at va kinologiya tajribasini o‘zida mujassam etgan keng ko‘lamli tadbirga aylandi. Tantanalar turkman alabayining xalq madaniy merosidagi o‘rnini namoyon etish, uning shuhratini xalqaro miqyosda yoyish hamda bu boradagi ezgu an’analarni davom ettirishda muhim ahamiyat kasb etdi.