Türkmen suratkeşleri Daşkentde halkara sungat sergisine gatnaşdy
Amul Info ·
Türkmen suratkeşleri Azat Muradow, Gunça Muradowa we Toýly Çopanow Özbegistanyň Daşkent şäherinde geçirilýän häzirki zaman sungatynyň XI Halkara biennalesiniň çäklerinde 30-dan gowrak eserini hödürlediler.
Türkmen suratkeşleriniň eserleri Özbegistanyň Daşkent şäherinde geçirilýän häzirki zaman sungatynyň XI Halkara biennalesiniň çäklerinde açylan sergide görkezilýär. «Wakalaryň gözýetimi» («Горизонт событий») diýlip atlandyrylýan bu halkara çäräniň açylyş dabarasy 2026-njy ýylyň 15-nji oktýabrynda geçirildi.
«Türkmenistan: Altyn asyr» neşiriniň habar bermegine görä, türkmen suratkeşleri Azat Muradow, Gunça Muradowa we Toýly Çopanow sergide 30-dan gowrak eserini köpçülige hödürlediler. Olaryň işlerinde türkmen halkynyň ruhy we medeni mirasy, taryhy hem-de däp bolan durmuş ýörelgeleri çeper beýan edilýär.
Suratkeş Toýly Çopanow sergä gatnaşmagyň maksady barada aýdyp, realistiki žiwopis we milli öwüşginler arkaly häzirki zaman dünýäsiniň depginini hem-de onuň öňünde durýan meseleleri çuňňur we täsirli beýan etmegiň mümkindigini ýaş kärdeşlerine görkezmek isleýändiklerini belledi.
Häzirki zaman sungatynyň XI Halkara biennalesine jemi 33 ýurtdan 70 suratkeş we kurator gatnaşýar. Bu halkara çäre dürli ýurtlaryň sungat wekilleriniň özara tejribe alyşmagy, döredijilik gatnaşyklaryny ösdürmegi we milli sungat däplerini dünýä jemgyýetçiligine tanyşdyrmagy üçin möhüm meýdança bolup hyzmat edýär.
Biennale Özbegistanyň Çeperçilik akademiýasy we Çeperçilik sergileriniň müdirligi tarapyndan guraldy.
Türkmen suratkeşleriniň bu halkara çärä gatnaşmagy milli şekillendiriş sungatynyň baý mirasyny daşary ýurtlarda tanyşdyrmaga hem-de Türkmenistanyň häzirki zaman sungatynyň halkara medeni giňişligindäki ornuny berkitmäge goşant goşýar.