Türkmenistan bilen Pakistan söwda-ykdysady hyzmatdaşlygy giňeltmegi maksat edinýär

Amul Info ·

Türkmenistan bilen Pakistan söwda-ykdysady hyzmatdaşlygy giňeltmegi maksat edinýär

Türkmenistanyň Söwda-senagat edarasynyň başlygy Mergen Gurdow bilen Pakistanyň Söwda-senagat palatalary federasiýasynyň prezidenti Atif Ikram Şeýh ikitaraplaýyn söwda we maýa goýum hyzmatdaşlygyny giňeltmek barada pikir alyşdylar. Taraplar energetika, dokma senagaty, oba hojalygy, derman…

Pakistan bilen Türkmenistanyň arasynda söwda-ykdysady gatnaşyklary ösdürmek, maýa goýum hyzmatdaşlygyny işjeňleşdirmek we iki ýurduň işewür toparlarynyň arasyndaky gatnaşyklary pugtalandyrmak boýunça ylalaşyk gazanyldy.

Bu barada «Atavatan Türkmenistan» neşiri habar berýär.

Degişli ylalaşyk Pakistanyň Söwda-senagat palatalary federasiýasynyň (FPCCI) prezidenti Atif Ikram Şeýh bilen Türkmenistanyň Söwda-senagat edarasynyň başlygy Mergen Gurdowyň arasynda geçirilen duşuşykda gazanyldy. FPCCI-niň binasynda geçirilen gepleşiklerde iki ýurduň telekeçileriniň arasynda göni gatnaşyklary ýola goýmak, işewür wekiliýetleriň özara saparlaryny yzygiderli guramak we bilelikdäki maýa goýum taslamalaryny durmuşa geçirmek meseleleri ara alnyp maslahatlaşyldy.

Duşuşykda Atif Ikram Şeýh energetika, gaýtadan dikeldilýän energiýa, dokma senagaty, oba hojalygy we derman senagaty ýaly ugurlarda hyzmatdaşlygy ösdürmek üçin giň mümkinçilikleriň bardygyny belledi. Ol iki ýurduň ykdysady kuwwatyny anyk söwda we maýa goýum taslamalaryna gönükdirmek üçin sazlaşykly çäreleriň zerurdygyny nygtady.

Pakistanyň Söwda-senagat palatalary federasiýasynyň ýolbaşçysy uzak möhletleýin hyzmatdaşlygy ösdürmek maksady bilen bilelikdäki maýa goýum forumlaryny geçirmek we iki ýurduň degişli işewür guramalarynyň arasynda özara düşünişmek hakynda ähtnamalara gol çekmek teklibini öňe sürdi. Şeýle hem işewür wekiliýetleriň yzygiderli saparlarynyň täze hyzmatdaşlary tapmakda we özara gatnaşyklary berkitmekde ähmiýetlidigini aýtdy.

Taraplar maglumat tehnologiýalary, sanly hyzmatlar, halal azyk önümleri we saglygy goraýyş ýaly ugurlarda hem hyzmatdaşlygy giňeltmegiň mümkinçiliklerine garadylar. Mundan başga-da, bazar maglumatlaryny, söwda statistikasy we işewürlik seljermelerini alyşmagyň täze ugurlary kesgitlemäge ýardam berjekdigi bellenildi.

Türkmenistanyň Söwda-senagat edarasynyň başlygy Mergen Gurdow öz çykyşynda Türkmenistanyň Pakistan bilen söwda-ykdysady gatnaşyklary ähli derejelerde ösdürmäge taýýardygyny tassyklady. Ol türkmen telekeçileriniň pakistanly işewürler, maýadarlar we söwda guramalary bilen has ýakyn hyzmatdaşlygy ýola goýmaga gyzyklanma bildirýändigini aýtdy.

Şeýle hem iki ýurduň arasynda asyrlaryň dowamynda kemala gelen dostlukly gatnaşyklaryň söwda, maýa goýum we işewürlik hyzmatdaşlygyny ösdürmek üçin möhüm esas bolup hyzmat edýändigi nygtaldy.

Duşuşygyň dowamynda taraplar bilelikdäki işewürlik forumlaryny geçirmek, maýa goýum gatnaşyklaryny işjeňleşdirmek we pudaklaýyn hyzmatdaşlygy giňeltmek arkaly iki ýurduň ykdysady hyzmatdaşlygyndaky täze mümkinçilikleri açmaga gyzyklanma bildirdiler.

Источник: Amul Info