Türkmenistanda rus filmlerine, seriallaryna we rus sungat ussatlarynyň çykyşlaryna gyzyklanma uly
Amul Info ·
Russiýanyň Türkmenistandaky ilçisi Iwan Wolynkiniň bellemegine görä, ýurtda rus filmleri, seriallary, aýdymlary we rus sungat ussatlarynyň konsertleri uly gyzyklanma döredýär. Şeýle-de, rus dilini öwrenmek ýaşlara bilim, ylym we hünär gatnaşyklary babatda täze mümkinçilikleri açýar.
Türkmenistanda rus diline we Russiýanyň medeniýetine gyzyklanma bildirilýär. Ýurtda rus filmleri we seriallary tomaşaçylar tarapyndan höwes bilen görülýär, rus estrada aýdymçylarynyň aýdymlary diňlenilýär, Russiýadan gelýän sungat ussatlarynyň konsertleri bolsa köplenç tomaşaçylardan doly zallarda geçirilýär. Bu barada Russiýa Federasiýasynyň Türkmenistandaky ilçisi Iwan Wolynkin «Rus Glagol» halkara edebiýat bäsleşiginiň metbugat gullugyna beren interwýusynda aýtdy.
Diplomatyň bellemegine görä, rus dilindäki aýdymlar söwda merkezlerinde we kafelerde hem ýygy-ýygydan ýaňlanýar. Onuň sözlerine görä, rus dili Türkmenistanda taryhy taýdan dürli milletleriň wekilleriniň arasynda aragatnaşyk serişdesi bolup hyzmat edip gelýär.
Iwan Wolynkin häzirki döwürde rus dilini öwrenmegiň ýaşlar üçin ähmiýetiniň uludygyny nygtady. Onuň pikiriçe, rus dilini bilmek ýaşlara Russiýanyň ýokary okuw mekdeplerinde bilim almaga, maglumat giňişliginden peýdalanmaga, ylmy we edebi mirasy öwrenmäge, şeýle hem hünär gatnaşyklaryny ýola goýmaga mümkinçilik berýär.
Ilçiniň aýtmagyna görä, Russiýanyň Türkmenistandaky ilçihanasy öz ygtyýarlyklarynyň çäklerinde rus diliniň okadylyşyny kämilleşdirmek, rus dili mugallymlaryny taýýarlamak, okuw serişdelerini döwrebaplaşdyrmak we rus edebiýatyny giňden wagyz etmek boýunça başlangyçlara ýardam berýär. Bu ugurdaky taslamalara diňe bir Aşgabatdaky hünärmenler däl, eýsem Türkmenistanyň beýleki sebitlerinden wekiller hem gatnaşýarlar.
Interwýuda rus diliniň halkara ähmiýetine hem aýratyn üns berildi. Her ýylyň 6-njy iýunynda, beýik rus şahyry Aleksandr Puşkiniň doglan gününde, dünýäniň köp ýurtlarynda, şol sanda Türkmenistanda hem Rus dili güni bellenilýär.
Aşgabatda bu senä bagyşlanan çäreleriň esasy geçirilýän ýerleriniň biri Puşkin seýilgähidir. 1901-nji ýylda bu ýerde şahyryň bürünçden ýasalan heýkeli oturdylypdyr. Baýramçylyk güni köp sanly adamlar şahyryň ýadygärligine gül desselerini goýmak üçin şol ýere barýarlar.
Russiýanyň ilçisi 2024-nji ýylda «Magtymguly Pyragy» medeni-seýilgäh toplumynda rus ýazyjysy Fýodor Dostoýewskiniň ýadygärliginiň açylmagyny hem möhüm waka hökmünde häsiýetlendirdi. Onuň bellemegine görä, bu başlangyç dünýä medeniýetiniň ösüşinde rus edebiýatynyň goşandyna berilýän hormatyň nyşany bolup durýar.