Дар Душанбе ҳамоишҳои байналмилалӣ дар соҳаи алоқа оғоз гардиданд
АМИТ "Ховар" · · g1221874
ДУШАНБЕ, 29.09.2026 /АМИТ «Ховар»/. Тавре қаблан иттилоъ додем, имрӯз дар шаҳри Душанбе ҳамоишҳои байналмилалӣ дар соҳаи алоқа, рақамикунонӣ ва технологияҳои иттилоотӣ ба кор оғоз намуданд, ки то 30 сентябр идома
ДУШАНБЕ, 29.09.2026 /АМИТ «Ховар»/. Тавре қаблан иттилоъ додем, имрӯз дар шаҳри Душанбе ҳамоишҳои байналмилалӣ дар соҳаи алоқа, рақамикунонӣ ва технологияҳои иттилоотӣ ба кор оғоз намуданд, ки то 30 сентябр идома меёбанд, иттилоъ медиҳад Хадамоти алоқаи назди Ҳукумати Ҷумҳурии Тоҷикистон.
Дар рӯзи аввал Форуми минтақавии Иттиҳоди байналмилалии алоқаи барқӣ оид ба рушд барои минтақаи Иттиҳоди Давлатҳои Мустақил баргузор гардид. Инчунин ҷаласаи муштараки Шурои сарони маъмурияти алоқаи Иттиҳоди минтақавӣ дар соҳаи алоқа ва Шурои ҳамоҳангсози кишварҳои аъзои Иттиҳоди Давлатҳои Мустақил доир мегардад.
Ҳадафи асосии ин ҳамоишҳо таҳкими ҳамкории давлатҳои минтақа, мубодилаи таҷриба ва баррасии роҳҳои муштараки рушди зерсохтори рақамӣ мебошад.
Дар ҳамоиш иштирокчиён масъалаҳои густариши шабакаҳои алоқа, рушди пайвастагии рақамӣ, татбиқи технологияҳои нав, аз ҷумла 5G, истифодаи алоқаи моҳвораӣ, рушди малакаҳои рақамӣ ва ҷалби сармоягузорӣ ба соҳаи рақамиро мавриди баррасӣ қарор медиҳанд.
Инчунин доир ба масъалаҳои амнияти киберӣ, такмили муҳити танзимгарӣ, рушди инноватсия ва истифодаи зеҳни сунъӣ дар соҳаҳои гуногун мубодилаи афкор доир мешавад. Мубодилаи таҷриба ва таҳияи ташаббусҳои муштарак яке аз самтҳои муҳими ин ҳамоиш мебошад.
Ҳамоишҳои байналмилалӣ дар соҳаи алоқа дар шаҳри Душанбе имкон медиҳанд, ки давлатҳои минтақа масъалаҳои мубрами рушди алоқа ва рақамикунониро баррасӣ намуда, роҳҳои нави ҳамкорӣ ва татбиқи лоиҳаҳои муштаракро муайян намоянд.
АКС: Хадамоти алоқаи назди Ҳукумати Ҷумҳурии Тоҷикистон