Türkmenistan bilen Eýran Sarahs gümrük geçelgesiniň geçirijilik kuwwatyny artdyrmagy meýilleşdirýär
Amul Info · · sarahs, ahal
🚛🇹🇲🇮🇷 Türkmenistan bilen Eýran Sarahs geçelgesiniň kuwwatyny artdyrmagy meýilleşdirýär. Taraplar Sarahs serhet geçelgesinden her gün azyndan 700 sany ýük awtoulagynyň geçmegini üpjün etmegi maksat edinýärler. Şeýle hem gümrük amallaryny çaltlandyrmak, demir ýol arkaly ýük daşamalaryny…
Türkmenistan bilen Eýran gümrük amallaryny çaltlandyrmak we Sarahs serhet geçelgesiniň geçirijilik kuwwatyny ýokarlandyrmak barada ylalaşdylar. Taraplar bu geçelgeden iki ýurduň çäginden her gün azyndan 700 sany ýük awtoulagynyň geçmegini üpjün etmegi maksat edinýärler. Şeýle hem demir ýol arkaly ýük daşamalaryny giňeltmek we serhet infrastrukturasyny kämilleşdirmek meselelerine garaldy.
«Westi Kawkaza» neşiriniň Eýranyň Gümrük administrasiýasynyň metbugat gullugyna salgylanyp habar bermegine görä, degişli meseleler iki ýurduň gümrük edaralarynyň wekilleriniň Eýranyň Sarahs serhet geçelgesinde geçirilen duşuşygynda ara alnyp maslahatlaşyldy.
Gepleşiklere Eýranyň ykdysady işler we maliýe ministriniň orunbasary, ýurduň Gümrük administrasiýasynyň baş direktory Forud Asgari hem-de Türkmenistanyň Döwlet gümrük gullugynyň başlygy Maksat Hudaýkulyýew gatnaşdy.
Duşuşygyň netijeleri boýunça taraplar Sarahs geçelgesinden geçýän ýük awtoulaglarynyň sanyny her tarapdan azyndan 350-ä ýetirmek barada ylalaşdylar. Şeýlelikde, iki ýurduň serhet geçelgesinden jemi azyndan 700 sany ýük awtoulagynyň geçmegi maksat edinilýär.
Duşuşykda özara haryt dolanyşygyny artdyrmak, gümrük amallaryny ýönekeýleşdirmek we söwda hyzmatdaşlygyny ösdürmek boýunça çäreler hem ara alnyp maslahatlaşyldy.
Gepleşikleriň aýratyn bir ugry demir ýol arkaly ýük daşamalaryny ösdürmek bilen bagly boldy. Türkmenistan bilen Eýran Sarahs sebitindäki demir ýol infrastrukturasyny kämilleşdirmek we ýük daşamak mümkinçiliklerini giňeltmek boýunça bilelikde iş alyp barmagy meýilleşdirýärler. Mundan başga-da, Lotfabad serhet geçelgesiniň infrastrukturasyny ösdürmek we ulag serişdeleriniň geçişini ýeňilleşdirmek mümkinçiliklerine garaldy.
Forud Asgariniň bellemegine görä, gümrük ulgamyndaky hyzmatdaşlygyň pugtalandyrylmagy daşary söwda dolanyşygynyň artmagyna we iki ýurduň halkara ýük daşamalaryndaky ornunyň giňelmegine ýardam eder. Ol Eýranyň goňşy döwletler bilen üstaşyr ulag geçelgeleri, söwda we gümrük dolandyryşy boýunça hyzmatdaşlygy ösdürmäge taýýardygyny hem nygtady.
Türkmenistanyň Döwlet gümrük gullugynyň başlygy Maksat Hudaýkulyýew bolsa Türkmenistan bilen Eýranyň arasyndaky söwda hyzmatdaşlygynyň yzygiderli pugtalandyrylýandygyny belledi. Onuň sözlerine görä, gümrük amallaryny sanlylaşdyrmak we daşary söwdany ýönekeýleşdirmek hyzmatdaşlygyň ileri tutulýan ugurlarynyň hataryna girýär. Türkmenistanyň tarapy awtomobil we demir ýol ulaglary arkaly ýük geçiriş mümkinçiliklerini artdyrmaga taýýardyr.