Türkmenistanyň migrasiýa gullugynyň wekilleri Almatydaky sebitleýin okuw maslahatyna gatnaşdylar
Amul Info ·
2026-njy ýylyň 20–21-nji oktýabrynda Gazagystanyň Almaty şäherinde halkara goragy meselelerine bagyşlanan sebitleýin okuw maslahaty geçirildi. Oňa Merkezi Aziýa ýurtlarynyň döwlet edaralarynyň we halkara guramalaryň wekilleri, şol sanda Türkmenistanyň Döwlet migrasiýa gullugynyň hünärmenleri…
Gazagystanyň Almaty şäherinde 2026-njy ýylyň 20–21-nji oktýabrynda halkara goragy meselelerine bagyşlanan sebitleýin okuw maslahaty geçirildi. Oňa Merkezi Aziýa ýurtlarynyň degişli döwlet edaralarynyň wekilleri, halkara guramalaryň hünärmenleri bilen birlikde Türkmenistanyň Döwlet migrasiýa gullugynyň wekilleri hem gatnaşdylar.
Türkmenistanyň Döwlet migrasiýa gullugynyň metbugat bölüminiň habar bermegine görä, okuw maslahatynyň esasy maksady migrasiýa meseleleri boýunça tejribe alyşmak, bosgunlaryň halkara goragyny üpjün etmek, migrasiýa işlerini netijeli dolandyrmak we raýatsyzlygyň öňüni almak boýunça hyzmatdaşlygy ösdürmekden ybarat boldy.
Çäräniň dowamynda halkara migrasiýa syýasatynyň häzirki zaman ugurlary, gaçybatalga bermegiň hukuk esaslary, Birleşen Milletler Guramasynyň Bosgunlaryň işi baradaky Ýokary Komissarynyň Müdirliginiň alyp barýan işleri hem-de bosgunlaryň hukuklaryny goramak boýunça halkara tejribeler ara alnyp maslahatlaşyldy.
Okuw maslahatynyň çäklerinde Merkezi Aziýa döwletleriniň migrasiýa babatdaky milli kanunçylyklarynyň aýratynlyklaryna, bosgun statusyny kesgitlemegiň tertiplerine we degişli amallary kämilleşdirmegiň mümkinçiliklerine hem garaldy.
Duşuşyga gatnaşyjylar migrasiýa ulgamynda sebitleýin hyzmatdaşlygyň ähmiýetini nygtap, tejribe alyşmagyň we özara gatnaşyklary ösdürmegiň bu ugurdaky meseleleriň netijeli çözülmegine ýardam berjekdigini bellediler.