Türkmenistanda plastiki hirurgiýanyň döwrebap usullary ara alnyp maslahatlaşyldy
Amul Info ·
11-nji oktýabrda Aşgabatda plastiki we dikeldiş hirurgiýasy, estetiki lukmançylyk boýunça plenar mejlis geçirildi. Onda Russiýadan gelen alymlar we lukmançylyk hünärmenleri döwrebap hirurgiýa usullaryny, mikrohirurgiýany, lazer tehnologiýalaryny hem-de näsaglaryň howpsuzlygyny üpjün etmegiň…
2026-njy ýylyň 11-nji oktýabrynda Aşgabat şäherinde «Plastiki, dikeldiş hirurgiýasy we estetiki lukmançylyk» atly plenar mejlis geçirildi. Çäre paýtagtda bir gün öň açylan halkara ylmy maslahatyň çäklerinde Estetiki merkeziň mejlisler zalynda guraldy. Bu barada Türkmenistanyň Halkara habarlar merkezi habar berýär.
Mejlise Plastiki, dikeldiş we estetiki hirurglaryň Russiýa jemgyýetiniň prezidenti, Türkmenistanyň Döwlet lukmançylyk uniwersitetiniň hormatly professory Natalýa Manturowanyň ýolbaşçylygyndaky rus alymlarynyň we lukmançylyk hünärmenleriniň wekiliýeti gatnaşdy.
Duşuşygyň dowamynda hünärmenler plastiki we dikeldiş hirurgiýasynyň häzirki zaman usullaryny, döwrebap kliniki teswirnamalary, mikrohirurgiýa arkaly dikeldiş amallaryny, şeýle hem lazer tehnologiýalarynyň lukmançylykda ulanylyşyny ara alyp maslahatlaşdylar. Näsaglaryň howpsuzlygyny üpjün etmek bilen bagly meseleler hem mejlisiň esasy ugurlarynyň biri boldy.
Gatnaşyjylar çylşyrymly dikeldiş operasiýalaryny geçirmek boýunça tejribe alyşdylar. Mundan başga-da, ýaş hirurglary taýýarlamagyň, olaryň hünär derejesini ýokarlandyrmagyň we amaly endiklerini kämilleşdirmek üçin önümçilik tejribesini guramagyň mümkinçiliklerine garaldy.
Mejlisiň dowamynda Türkmenistanyň we Russiýanyň degişli kliniki merkezleriniň arasyndaky hyzmatdaşlygy giňeltmäge aýratyn üns berildi. Hususan-da, ylmy tejribe alyşmak, lukmançylyk hünärmenleriniň özara gatnaşyklaryny ösdürmek we ýokary tehnologiýaly lukmançylyk ulgamynda bilelikdäki işleri ýola goýmak meseleleri ara alnyp maslahatlaşyldy.
Şeýle duşuşyklar plastiki we dikeldiş hirurgiýasy boýunça halkara tejribäni öwrenmäge, lukmançylyk hünärmenleriniň bilimlerini baýlaşdyrmaga hem-de häzirki zaman bejeriş usullaryny ösdürmäge mümkinçilik döredýär.