ABŞ-da kazyýet DV-2027 Green Card lotereýasynyň başlanmagyna degişli kararyň ýerine ýetirilmegini togtatdy
Amul Info ·
ABŞ-nyň 9-njy federal apellýasiýa kazyýeti DV-2027 Green Card maksatnamasynyň hasaba alnyşyny 1-nji noýabrda başlamagy talap edýän ozalky kararyň ýerine ýetirilmegini wagtlaýyn togtatdy. Bu lotereýanyň ýatyrylandygyny aňlatmaýar, emma arzalaryň kabul ediljek senesi häzirlikçe näbelli bolup galýar.
ABŞ-nyň 9-njy federal apellýasiýa kazyýeti Donald Trampyň administrasiýasynyň haýyşyny kanagatlandyryp, DV-2027 Green Card maksatnamasy boýunça arzalaryň kabul edilmegini başlamagy talap edýän ozalky kazyýet kararynyň ýerine ýetirilmegini wagtlaýyn togtatdy.
Bu karar bilen, DV-2027 Green Card lotereýasynyň 2026-njy ýylyň 1-nji noýabrynda başlanmagyna garaşylmaýar.
Üç kazydan — M. Margaret McKeown, N. Randy Smith we Holly A. Thomasdan ybarat topar administrasiýanyň apellýasiýa şikaýatyna seredilýänçä ozalky kararyň güýjüni wagtlaýyn saklamak baradaky haýyşyny goldady.
Kazyýet öz kararynda ABŞ-nyň Döwlet departamentiniň Green Card maksatnamasy boýunça hasaba alyş işlerini heniz başlamandygyny belledi. Şeýle-de, «Red Eagle» tarapynyň degişli kanun arkaly goralýan bähbitleriniň çägine girýändigini we şol kanuna esaslanyp talap bildirmäge hukugynyň bardygyny ýeterlik derejede subut edip bilmändigini aýtdy.
Şunuň bilen baglylykda, administrasiýanyň apellýasiýa şikaýatyna garalýança ozalky kararyň ýerine ýetirilmegini togtatmak baradaky gyssagly haýyşy kanagatlandyryldy. Şeýle hem işiň mundan beýläk dowam etdirilmegi üçin zerur resminamalaryň tabşyrylmaly möhletleriniň kesgitlenjekdigi habar berildi.
Kazyýetiň täze karary 1-nji noýabrda arzalaryň kabul edilmegini başlamagy talap edýän ozalky çözgüdiň häzirlikçe ýerine ýetirilmejekdigini aňladýar.
Şol bir wagtyň özünde, bu karar DV-2027 Green Card lotereýasynyň doly ýatyrylandygyny aňlatmaýar. Maksatnama boýunça hasaba alyşyň haçan başlanjakdygy baradaky mesele heniz gutarnykly çözülmedi.