COP31 doirasida Turkmaniston xalqaro tashkilotlar bilan bir qator hujjatlarni imzoladi
Amul Info ·
COP31 doirasida Turkmaniston xalqaro tashkilotlar bilan atrof-muhitni muhofaza qilish, iqlim o‘zgarishiga qarshi kurashish va barqaror rivojlanishni qo‘llab-quvvatlash bo‘yicha bir qator hujjatlarni imzoladi. Ular orasida FAO bilan 2026–2030-yillarga mo‘ljallangan hamkorlik dasturi, HCFC…
Turkiyaning Antaliya shahrida bo‘lib o‘tayotgan BMTning Iqlim o‘zgarishi to‘g‘risidagi doiraviy konvensiyasi ishtirokchilari 31-konferensiyasi (COP31) doirasida Turkmaniston va xalqaro tashkilotlar o‘rtasida bir qator muhim hujjatlar imzolandi.
Xalqaro forumda Turkman xalqining Milliy yetakchisi, Turkmaniston Xalq Maslahati raisi Gurbanguly Berdimuhamedov ishtirokida Turkmaniston delegatsiyasi ham qatnashmoqda.
Turkmaniston axborot portalining xabar berishicha, imzolangan hujjatlar qatoridan Bolalar, yoshlar va iqlim o‘zgarishiga qarshi harakatlar to‘g‘risidagi deklaratsiya ham o‘rin olgan. Ushbu hujjatga Turkmaniston ta’lim vaziri Jumamyrat Gurbangeldiyev imzo chekdi.
Konferensiya doirasida atrof-muhitni muhofaza qilish, qishloq xo‘jaligi, energetika hamda suv resurslarini boshqarish sohalarida ham bir qator kelishuvlarga erishildi.
Ular orasida 2026–2030-yillarda Turkmanistonda gidroxlorftoruglerodlardan (HCFC) foydalanishni bosqichma-bosqich to‘xtatish loyihasining uchinchi bosqichini amalga oshirish to‘g‘risidagi kelishuv ham bor.
Shuningdek, Turkmaniston va Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) o‘rtasidagi hamkorlik yangi besh yillik davrga uzaytirildi. Tomonlar 2026–2030-yillarga mo‘ljallangan Mamlakat bo‘yicha hamkorlik doiraviy dasturini tasdiqladilar.
Turkmaniston atrof-muhitni muhofaza qilish vaziri Ovezgeldi Goshjanov va BMT Taraqqiyot dasturining Turkmanistondagi doimiy vakili Narine Saakyan o‘rtasida ham hujjat imzolandi. Qo‘shma loyiha mamlakatning turli hududlarida energetik o‘tishni qo‘llab-quvvatlashga qaratilgan.
Bundan tashqari, Turkmaniston Suv xo‘jaligi davlat qo‘mitasi va Xalqaro suv resurslarini boshqarish instituti (IWMI) o‘zaro anglashuv va uzoq muddatli hamkorlik to‘g‘risidagi memorandumni imzoladilar.
Mazkur hujjatlar Turkmanistonning xalqaro tashkilotlar bilan atrof-muhitni muhofaza qilish, iqlim o‘zgarishi oqibatlarini yumshatish, barqaror rivojlanishni ta’minlash hamda tabiiy resurslardan samarali foydalanish yo‘nalishlaridagi hamkorligini rivojlantirishga qaratilgan.