Türkmenistan zenan telekeçiligini ösdürmäge bagyşlanan sebitleýin biznes-foruma gatnaşdy
Amul Info ·
Türkmenistanyň wekilleri Merkezi Aziýa ýurtlarynyň we Azerbaýjanyň zenan ýolbaşçylarynyň dialogynyň çäklerinde geçirilen halkara onlaýn biznes-foruma gatnaşdylar. Çäräniň dowamynda zenan telekeçileri goldamak, maliýe mümkinçiliklerini giňeltmek we täze bazarlara çykmak meseleleri ara alnyp…
Türkmenistanyň wekilleri Merkezi Aziýa ýurtlarynyň we Azerbaýjanyň zenan ýolbaşçylarynyň dialogynyň çäklerinde geçirilen «Merkezi Aziýa ýurtlarynda we Azerbaýjanda zenanlaryň telekeçiligi: ykdysady integrasiýa, täze mümkinçilikler we durnukly sebitleýin hyzmatdaşlyk» atly halkara onlaýn biznes-foruma gatnaşdylar. Bu barada Özbegistanyň UZA habarlar agentligi habar berýär.
Forumyň esasy maksady sebitde zenan telekeçiligini ösdürmek, işewür aýallaryň mümkinçiliklerini giňeltmek we döwletleriň arasynda ykdysady hyzmatdaşlygy pugtalandyrmak bilen baglanyşykly meseleleri ara alyp maslahatlaşmakdan ybarat boldy.
Çäräniň dowamynda Merkezi Aziýa ýurtlarynyň we Azerbaýjanyň parlamentleriniň, söwda-senagat edaralarynyň, maliýe düzümleriniň hem-de işewür toparlarynyň wekilleri özara tejribe alyşdylar. Gatnaşyjylar zenan telekeçileri maliýe serişdeleri bilen üpjün etmek, täze bazarlara çykmak, bilelikdäki taslamalary durmuşa geçirmek, önümçilik we söwda gatnaşyklaryny ösdürmek ýaly ugurlara aýratyn üns berdiler.
Şeýle-de uzak möhletleýin ykdysady hyzmatdaşlygy ýola goýmagyň we telekeçi zenanlaryň sebit derejesindäki işewürlik gatnaşyklaryny giňeltmegiň mümkinçilikleri ara alnyp maslahatlaşyldy.
Forumyň netijeleri boýunça telekeçi zenanlaryň arasynda dokuz sany ähtnamany, iki sany ylalaşygy we ýedi sany şertnamany baglaşmak barada ylalaşyk gazanyldy. Bu resminamalara şu ýylyň dekabr aýynda Merkezi Aziýa ýurtlarynyň we Azerbaýjanyň zenan ýolbaşçylarynyň dialogynyň çäklerinde geçiriljek çärede gol çekilmegine garaşylýar.
Sebit ýurtlarynyň arasynda geçirilýän şeýle işewürlik çäreleri zenanlaryň telekeçilik başlangyçlaryny goldamak, ykdysady hyzmatdaşlygy ösdürmek we täze işewürlik mümkinçiliklerini döretmek üçin möhüm meýdança bolup hyzmat edýär.