Türkiýede bilim alýan daşary ýurtly talyplar üçin goşmaça talyp haky maksatnamasy yglan edildi
Amul Info ·
Türkiýede öz hasabyna bilim alýan daşary ýurtly talyplar üçin «Başarı Burs Programı» goşmaça talyp haky maksatnamasy yglan edildi. Aýlyk goldaw bakalawrlara 6 500, magistrantlara 9 500, doktorantlara 13 000 türk lirasy möçberinde berler. Arzalar 6–27-nji noýabr aralygynda kabul edilýär. Maksatnama…
Türkiýede öz serişdeleriniň hasabyna ýokary bilim alýan daşary ýurtly talyplar üçin «Başarı Burs Programı» atly goşmaça talyp haky maksatnamasy boýunça arzalar kabul edilýär . Maksatnama Türkiýäniň Daşary ýurtlardaky türkler we garyndaş halklar edarasy (YTB) tarapyndan amala aşyrylýar.
Bu mümkinçilik Türkiýäniň ýokary okuw mekdeplerinde bakalawr, magistratura ýa-da doktorantura maksatnamalary boýunça bilim alýan, okuw töleglerini öz hasabyna töleýän we başga bir guramadan talyp haky almaýan daşary ýurtly talyplar üçin niýetlenendir.
Maksatnamanyň çäklerinde berilýän talyp hakynyň möçberi bilim derejesine görä kesgitlenýär. Hususan-da, bakalawr talyplaryna aýda 6 500 türk lirasy, magistratura talyplaryna 9 500 türk lirasy, doktorantura talyplaryna bolsa 13 000 türk lirasy möçberinde maliýe goldawy göz öňünde tutulýar.
Arzalar 2026-njy ýylyň 6–27-nji noýabry aralygynda kabul edilýär. Türkiýede bilim alýan türkmenistanly talyplar hem bellenilen şertlere laýyk gelýän ýagdaýynda bu maksatnama gatnaşmak üçin ýüz tutup bilerler.
Maksatnama barada giňişleýin maglumat almak we elektron görnüşinde arza tabşyrmak üçin «Türkiye Bursları» maksatnamasynyň resmi internet sahypasyna — www.turkiyeburslari.gov.tr salgylanmak bolýar.